Girl With One Leg walks To School: 'અડગ મનના માનવીને હિમાલય પણ નડતો નથી' આ કહેવતને સાર્થક કરી બતાવી છે કે, 10 વર્ષની એક છોકરીએ. 10 વર્ષીય સીમા માંઝી (Seema Manjhi) બિહારના (Bihar) જમુઈ જિલ્લામાં (Jamui district) આવેલાં નાનકડા ફતેહપુરમાં (Fatehpur) રહે છે. રોડ એક્સિડેન્ટને કારણે સીમાને એક પગ ગુમાવવાનો વારો આવ્યો હતો. આવી સ્થિતિમાં અનેક વ્યક્તિઓ હાર માનીને ઘરે બેસી જાય છે. પણ 10 વર્ષની સીમા તેમાંની ન હતી. સીમાને શાળાએ જઈને ભણવાની તીવ્ર ઈચ્છા હતી. એક પગ ન હોવા છતાં પણ તે હાર માનવા તૈયાર ન હતી. શાળા તેના ઘરથી એક કિમી દૂર આવેલી હતી. ગરીબ પરિવારમાંથી આવતી સીમાના માતા-પિતા પાસે એટલાં પૈસા પણ ન હતા, કે તે સીમા માટે એક ટ્રાઈસાઈકલ ખરીદી આપે. આ તમામ મુશ્કેલીઓ છતાં પણ સીમાએ મનમાં ગાંઠ વાળી લીધી હતી કે, તે ભણીને જ રહેશે. બસ પછી તો, શું, એક પગ વડે ચાલતાં-ચાલતાં જે 1 કિમી દૂર આવેલી શાળાએ ભણવા માટે જતી હતી. જો કે, સીમાનો આ વિડીયો સોશિયલ મીડિયામાં વાયરલ થઈ ગયો હતો. અને આજે સૌ કોઈ જાણે છે કે, આજના જમાનામાં સોશિયલ મીડિયાનો પાવર કેટલો છે. સીમાનો વિડીયો આગની જેમ વાયરલ થતાં જ ચોતરફથી તેના માટે સહાયનો ધોધ શરૂ થઈ ગયો હતો. બોલીવુડ એક્ટર સોનુ સૂદથી લઈ દિલ્હીના સીએમ અરવિંદ કેજરીવાલ સુધીની હસ્તીઓએ સીમાને મદદ કરવાની તૈયારી દેખાડી હતી. આજે સીમા અન્ય છોકરીઓને પણ ભણવા માટે પ્રેરણા આપે છે.
સીમાનો પરિવાર ખુબ જ ગરીબ છે, તે સીમા માટે ટ્રાઈસાઈકલ પણ ખરીદી શકે તેવી સ્થિતિમાં નથી. સીમાના માતા બેબી દેવી ઈંટની ભઠ્ઠીમાં કામ કરે છે. તેઓએ કહ્યું કે, અમારી પુત્રી માટે પુસ્તકો ખરીદવા માટે અમારી પાસે પૈસા નથી. શાળાના શિક્ષકો જ તમામ વસ્તુઓ તેને પૂરી પાડે છે. જ્યારે સીમાના પિતા ખીરન માંઝી અન્ય રાજ્યમાં મજૂર તરીકે કામ કરે છે. સીમાના છ ભાઈ-બહેનો છે અને તે બીજા નંબરનું સંતાન છે.
સીમાનો આ વિડીયો જોઈ અનેક લોકો ભાવુક થઈ ગયા છે. દિલ્હીના CM અરવિંદ કેજરીવાલે જણાવ્યું કે, 10 વર્ષની સીમાના ઉત્સાહે મને ઈમોશનલ કરી દીધો છે. દેશના તમામ બાળકો સારું શિક્ષણ ઈચ્છે છે... હું જાણું છું કે, તમામ સરકાર પાસે પૂરતાં સંશાધનો છે. સીમા જેવા બાળકોને શક્ય તેટલું શ્રેષ્ઠ શિક્ષણ આપવું એ સાચા દેશભક્તનું મિશન હોવું જોઈએ, અને આ સાચી દેશભક્તિ છે.
બોલીવુડ એક્ટર સોનુ સૂદે ટ્વીટ કરીને લખ્યું કે, હવે તે શાળાએ એક પગ પર નહીં પણ બંને પગ પર કૂદકા મારીને જશે. હું તેને ટિકિટ મોકલી રહ્યો છું, હવે બંને પગ પર ચાલવાનો સમય આવી ગયો છે.
સીમાએ જણાવ્યું કે, તે એક શિક્ષક બનવા માગે છે અને ગામના તેમજ આસપાસના તમામ બાળકોને ભણાવવા માગે છે. સીમા શાળાએ એટલી નિયમિત છે કે, તેણે એક ક્લાસ મિસ કર્યો નથી, જેના વખાણ સીમાના શિક્ષકો પણ કરી રહ્યા છે.
રોડ એક્સિડેન્ટમાં એક પગ ગુમાવ્યા બાદ સીમાએ કેવી રીતે હિંમત એકઠી કરી તેને યાદ કરતાં સીમાના દાદી લક્ષ્મી દેવીએ જણાવ્યું કે, અકસ્માત બાદ તે ઘરની બહાર જઈ શકતી ન હતી. પણ એક દિવસે તેણે મને કહ્યું કે, તે ભણવા માગે છે અને શાળાએ જવા માગે છે. આ તેની હિંમત જ હતી, કે તે આ ટ્રોમામાંથી બહાર આવી શકી, અને એક પગ ઉપર શાળાએ જવા લાગી.