પ્રેગ્નેન્ટ પત્ની પરીક્ષા આપી શકે તે માટે પતિએ 1300 કિમી સ્કૂટર ચલાવ્યું

તમે કોઈ કામ પૂરું કરવા માટે સંકલ્પ કરો અને તે માટે મહેનત કરો તો ચોક્કસપણે તેનું સારું પરિણામ મળે છે. ઝારખંડમાં રહેતા એક કપલ પૈકી પતિએ 1300 કિલોમીટર સ્કૂટર ચલાવ્યું કે જેથી પ્રેગ્નેન્ટ પત્ની પરીક્ષા આપી શકે. દશરથ અને સોની માંઝી નામનું આ કપલ ઝારખંડમાં રહે છે, તેમણે તારીખ 28 ઓગસ્ટના દિવસે ટ્રાવેલિંગ શરૂ કર્યું અને 30 ઓગસ્ટે મધ્યપ્રદેશના ગ્વાલિયર પહોંચ્યા. આ દરમિયાન પતિએ 1300 કિલોમીટર સ્કૂટર ચલાવ્યું અને 7 મહિનાની પ્રેગ્નેન્ટ પત્ની પાછળ બેઠી હતી.

દશરથે જણાવ્યું કે મારી પત્ની ગર્ભવતી છે અને અમે એક રેઈનકોટના સહારે ઘરેથી નીકળ્યા હતા. તેણે જણાવ્યું કે હું વધુ ભણેલો નથી પણ એવી ઈચ્છા છે કે મારી પત્ની ભણીને શિક્ષિકા બને. પત્ની બીજા વર્ષમાં અભ્યાસ કરે છે અને તેનું આ વર્ષ બગડે નહીં તે માટે પરીક્ષા આપવી જરૂરી હતી. હાલ ટ્રેન ચાલી રહી નથી અને ટેક્સીનું ભાડું રૂપિયા 25થી 30 હજાર હોવાનું જાણવા મળ્યું કે જે પરવડે તેમ નહોતું. માટે અમે સ્કૂટર પર બેસીને ઝારખંડથી મધ્યપ્રદેશના ગ્વાલિયર જવાનો નિર્ણય લીધો.

દશરથે કહ્યું કે સવારથી મારા પર ઘણાં ફોન આવી રહ્યા છે. મધ્યપ્રદેશ સરકારે ઝારખંડ પરત ફરવા માટે મને મદદની વાત કરી છે. દશરથ કે જેઓ 37 વર્ષના છે અને એક કેટરિંગ કંપનીમાં કામ કરે છે. તેઓની મહિનાની આવક માત્ર રૂપિયા 9,000 છે પણ ઈરાદા મજબૂત છે. માટે પત્ની પરીક્ષા આપી શકે તે માટે 1300 કિલોમીટર સ્કૂટર ચલાવ્યું. આ દરમિયાન તેઓનો પેટ્રોલનો ખર્ચો 2000 રૂપિયાની આસપાસ થયો છે. તેમણે આ યાત્રા દરમિયાન રાત્રે એક્સપ્રેસ વે નજીકના બગીચામાં રાત પસાર કરી હતી.

આ યાત્રા દરમિયાન તેમણે ખરાબ અને પાણીથી ભરાયેલા રસ્તા, વરસાદનો સામનો કર્યો હતો. ટ્રાવેલ માટેના પૈસા નહીં હોવાથી તેમણે ઘરેણાં ગિરવે મૂકવાનો નિર્ણય લીધો. જિલ્લા વહીવટકર્તાઓ તરફથી આ કપલને રાહતપેટે રૂપિયા 5000 આપવામાં આવ્યા છે.