દિલ્હીમાં એક દિવસમાં 131 લોકોએ કોરાનાથી જીવ ગુમાવ્યો, કુલ કેસ 5 લાખને પાર

નવી દિલ્હીઃ દિલ્હીમાં એક દિવસમાં કોરોનાના કારણે જીવ ગુમાવનારા દર્દીઓનો રેકોર્ડ તૂટ્યો છે, પાછલા 24 કલાકમાં અહીં 131 દર્દીઓએ જીવ ગુમાવ્યો છે, આ સાથે નવા 7,486 કેસ સાથે કુલ કેસનો આંકડો 5 લાખને પાર કરી ગયો છે. આ પહેલા 12 નવેમ્બરે એક જ દિવસમાં સૌથી વધુ 104 લોકોએ જીવ ગુમાવ્યો હતો.

એક્સપર્ટ્સનું માનવું છે કે કોરોના કેસમાં જે રીતે ઉછાળો નોંધાઈ રહ્યો છે તેના કારણે મૃત્યુઆંકમાં પણ વધારો થઈ રહ્યો છે. દિલ્હીમાં પાછલા 1 લાખ કેસ માત્ર 15 દિવસમાં નોંધાયા છે. જે મુખ્ય શહેરોમાં નોંધાયેલા કેસોમાં સૌથી આગળ છે. લગભગ દિલ્હી જેટલી વસ્તી ધરાવતા મુંબઈમાં આટલા સમયમાં 2.7 લાખ કેસ વધ્યા છે. જોકે, મુંબઈમાં 10,615 લોકોએ કોરોનાથી જીવ ગુમાવ્યો છે જ્યારે દિલ્હીનો આંકડો 7,943 છે.

રાજ્ય અને કેન્દ્ર શાસિત પ્રદેશોમાં નોંધાયેલા કોરોનાના કુલ કેસના આંકડામાં મહારાષ્ટ્ર (16.3 લાખ) સૌથી આગળ છે, આ પછી આંધ્રપ્રદેશ (8.6 લાખ), કર્ણાટકા (8.3 લાખ), તામિલનાડુ (7.4 લાખ), કેરળ (5.4 લાખ) અને ઉત્તરપ્રદેશ (5.2 લાખ) અને દિલ્હી સાતમા નંબર પર છે.

રાજ્યના સ્વાસ્થ્ય માળખા પર કોરોનાની અસર થઈ રહી છે. ગંભીર બીમારીઓથી પીડાતા દર્દીઓને બેડ્સ માટે રજા અપાઈ રહી છે.

દિલ્હીની કોરોના એપ મુજબ હોસ્પિટલની પથારીઓ વિશે મળતી રિયલ ટાઈમ માહિતી પ્રમાણે 92% ICU પથારીઓ કે જ્યાં વેન્ટિલેટર સપોર્ટ છે અને 87% ICU બેડ કે જે વેન્ટિલેટર સપોર્ટ વગરના છે તે ભરાઈ ગયા છે.

રાજ્યમાં કોરોના કેસમાં વધારો થવાના ખતરાને ધ્યાનમાં રાખીને હોસ્પિટલમાં ICU પથારીઓની સંખ્યા વધારવામાં આવશે જેની સાથે કુલ ICU પથારીઓની સંખ્યા વધારીને 1,400 કરાશે.

દિલ્હીના અધિકારીઓ કહે છે કે ટેસ્ટની સંખ્યા વધારવામાં આવી છે તેની સાથે કોરનાના કેસમાં પણ વધારો થયો છે. પાછલા 24 કલાકમાં 62,232 લોકોના દિલ્હીમાં કોરોના ટેસ્ટ કરવામાં આવ્યા જેમાં 12.03% (7,486) લોકો પોઝિટિવ આવ્યા.

દિલ્હીમાં કોરોના કેસને કાબૂમાં લેવા માટે પ્રયાસો શરુ કરવામાં આવ્યા છે. લગ્નમાં મહેમાનોની સંખ્યા ઘટાડવાની સાથે હોસ્પિટલમાં પથારીઓની સંખ્યા વધારવા સુધીના પ્રયાસો કરવામાં આવી રહ્યા છે. પરંતુ દિવાળી દરમિયાન લોકો દ્વારા દાખવવામાં આવેલી બેદરકારીના કારણે કોરોના કેસની સંખ્યામાં ઉછાળો આવી રહ્યો હોવાનું માનવામાં આવી રહ્યું છે.