17 વર્ષના દીકરાએ 12 વર્ષની બચતમાંથી મમ્મીને બર્થ ડે પર અપાવ્યું ફ્રીઝ

આપણે નાના હતા ત્યારે આપણે પિગી બેન્કમાં રૂપિયા બચાવતા અને તેમાંથી આપણને બહુ ઈચ્છા હોય તેવી કોઈ ચીજની ખરીદી કરતા. પરંતુ આ 17 વર્ષનો કૉલેજનો વિદ્યાર્થી આપણા બધા કરતા અલગ છે. તેણે પોતાના શોખ માટે નહિ પરંતુ તેની માતા માટે પોતાની 12 વર્ષની પાઈ-પાઈની બચત ખર્ચી નાંખી. રામ પાલ સિંહે પોતાની પિગી બેંકમાંથી બધા સિક્કા કાઢીને તેમાંથી માતા માટે એક રેફ્રિજરેટર ખરીદ્યું હતું. ફ્રીઝ ખરીદવા માટે તેણે 35 કિલોના કોથળામાં કોઈન ભેગા કર્યા હતા. હવે ટેલિગ્રામ પર મેળવો દરેક મહત્વના સમાચાર, શરુ કરવા અહીં ક્લિક કરો રસપ્રદ વાત એ છે કે તે જ્યારે ફ્રીજ લેવા ગયો ત્યારે તેમાં 2000 રૂપિયા ખૂટતા હતા. પરંતુ આ છોકરાના સમર્પણ ભાવથી પ્રભાવિત થઈને શો રૂમે તેને એટલું ડિસ્કાઉન્ટ આપી દીધું હતું. રામ સિંહ જોધપુરમાં રહે છે. માતાના જન્મ દિવસે તેણે છાપામાં ફ્રીઝની એડ જોઈ હતી. તેણે તેનાથી પ્રેરાઈને શો રૂમને ફોન કર્યો હતો. તેણે કહ્યું કે તે ફ્રીઝ ખરીદવા માંગે છે પણ ફક્ત સિક્કામાં જ પૈસા ચૂકવી શકશે. પહેલા તો શોરૂમના માલિકે ના પાડી પણ પાછળથી તે તૈયાર થઈ ગયો. રામ સિંહ કહે છે, “અમારુ જૂનું ફ્રીઝ બગડી ગયું હતું અને મારી માતા નવુ ફ્રીઝ ખરીદવાની વાત કર્યા કરતી હતી. મેં વિચાર્યું કે મેં વર્ષો સુધી ભેગા કરેલા કોઈન્સથી હું નવુ ફ્રીઝ ખરીદી શકીશ. શો રૂમના માલિકે મને કહ્યું કે તે મને મદદ કરશે. મને લાગ્યું કે મારા વિચારો સારા હશે તો તે મને મદદ કરશે. આથી હું સિક્કા લઈ શોરૂમ પર ગયો.” 12 વર્ષમાં રામ સિંહે રૂ. 13,500 જમા કર્યા હતા. તે કહે છે, “હું માટીના ઘડામાં આ સિક્કા રાખતો હતો. પછી હું સિક્કાને ચાર અલગ પેકેટમાં ભરતો અને તેને કોથળામાં ભરતો. મને સિક્કા ગણવામાં 4 કલાક થઈ ગયા. દુકાનના માલિકે ફક્ત 5 અને 10ના જ સિક્કા ગણ્યા. તેણે કહ્યું તેને મારા માતા પ્રત્યેના સમર્પણમાં શ્રદ્ધા છે અને તેણે બીજા સિક્કા ગણ્યા જ નહિ.”