25 દેશો 'મેડ ઈન ઈન્ડિયા' કોરોના વેક્સિન ખરીદવા લાઈનમાં છેઃ સરકાર

ભારતે અત્યાર સુધી 15 દેશોને કોરોના વાયરસની વેક્સિન આપી છે અને હજી 25 દેશો ભારતમાં બનેલી કોવિડ-19 વેક્સિન ખરીદવા માટે લાઈનમાં છે, તેમ વિદેશ મંત્રી એસ જયશંકરે શનિવારે જણાવ્યું હતું. તેમણે કહ્યું હતું કે ત્રણ કેટેગરીના દેશો ભારત પાસેથી વેક્સિન મેળવવા આતુર છે જેમાં ગરીબ, પરવળે તેવી કિંમતમાં ખરીદવા ઈચ્છતા દેશો તથા અન્ય એવા દેશો છે જેઓ વેક્સિન બનાવી રહેલી કંપનીઓ સાથે સીધા સંપર્કમાં છે.

જયશંકરે જણાવ્યું હતું કે, મને યાદ છે તે પ્રમાણે ભારતે અત્યાર સુધી 15 દેશોને વેક્સિન મોકલાવી છે. હું એટલું કહી શકું છું કે હજી 25 જેટલા અન્ય દેશો ભારત પાસેથી વેક્સિન ખરીદવા માટે આતુર છે અને તેમની વાતચીત વિવિધ તબક્કામાં છે. વેક્સિને ભારતને વિશ્વમાં લોકપ્રિય બનાવી દીધું છે.

તેમણે વધારેમાં જણાવ્યું હતું કે, ઘણા ગરીબ દેશોને ગ્રાન્ડના આધારે વેક્સિન પૂરી પાડવામાં આવશે જ્યારે કેટલાક દેશોને ભારતીય સરકાર વેક્સિન ઉત્પાદકો પાસેથી જેટલા રૂપિયામાં વેક્સિન ખરીદે છે તેટલી કિંમતે આપવામાં આવશે. ઘણા દેશો વેક્સિન બનાવતી ભારતીય કંપનીઓ સાથે સીધા સંપર્કમાં છે અને તેઓ તેમની સાથે વાટાઘાટો કરી રહ્યા છે.

ભારતે અત્યાર સુધી બે કોવિડ-19 વેક્સિનને મંજૂરી આપી છે. જેમાં ભારત બાયોટેકની કોવેક્સિનનો સમાવેશ થાય છે. આ વેક્સિન ભારત બાયોટેકે સરકારના સહયોગથી બનાવી છે. જ્યારે બીજી ઓક્સફોર્ડ-એસ્ટ્રાઝેનેકાની કોવિશિલ્ડ વેક્સિન છે. જેનું ઉત્પાદન પૂણેમાં આવેલી સીરમ ઈન્સ્ટિટ્યુટ ઓફ ઈન્ડિયા દ્વારા કરવામાં આવી રહ્યું છે. ભારતે આ બંને વેક્સિનના તાત્કાલિક ઉપયોગની મંજૂરી આપી હતી અને 16 જાન્યુઆરીથી દેશભરમાં રસીકરણ શરૂ કરી દેવામાં આવ્યું હતું.

બીજી તરફ રશિયન વેક્સિન સાથે કરાર કરનારી કંપની ડોક્ટર રેડ્ડીએ પણ તાજેતરમાં જણાવ્યું હતું કે કંપની રશિયાની વેક્સિન સ્પુતનિકના ઈમર્જન્સી ઉપયોગ માટે માર્ચમાં સરકાર પાસે મંજૂરી માંગશે.