મોટા ખજાના જેવી સુરક્ષા, 'Z+ સિક્યુરિટી'માં તમારા સુધી કેવી રીતે પહોંચી રહી છે વેક્સીન?

નવી દિલ્હી: કોરોના વાયરસ સામે લડતા ભારત માટે હવે રાહત થોડા દિવસો દૂર છે. ભારતમાં 16 જાન્યુઆરીથી સૂચિત રસીકરણ પ્રક્રિયા માટે કોવિશિલ્ડ વેક્સીનની પહેલી ફ્લાઈટ દિલ્હી આવી ચૂકી છે. આ પહેલા રસીની પ્રથમ ખેપ પુણેના સીરમ ઇન્સ્ટિટ્યૂટ ઓફ ઈન્ડિયામાંથી રવાના થઈ હતી. આ દરમિયાન સીરમના કર્મચારીઓએ તાળીઓ વગાડીને વિદાય આપી હતી, જ્યારે ટ્રકમાં બેઠેલા ડ્રાઇવરોએ પણ વિક્ટ્રી સાઈન બતાવી હતી. રસીના ડોઝને ત્રણ ટ્રકમાં ભરીને પુણે એરપોર્ટ લઈ જવામાં આવ્યા હતા. અહીંથી દેશના વિવિધ ભાગોમાં રસી પહોંચાડવામાં આવી રહી છે. જણાવી દઈએ કે, 16 જાન્યુઆરી એટલે કે શનિવારથી ભારતમાં પણ રસીકરણ શરૂ થશે. ભારત પાસે બે રસી છે - પ્રથમ સ્વદેશી કોવેક્સિન અને બીજી ઓક્સફર્ડ-એસ્ટ્રાઝેનેકાની કોવિશિલ્ડ સીરમ ઇન્સ્ટિટ્યૂટ ઓફ ઈન્ડિયા પુના ખાતે તૈયાર કરવામાં આવી છે. જુઓ, કેવી રીતે સુરક્ષા વચ્ચે કોવિશિલ્ડની પહેલી ખેપ મોકલામાં આવી...
કડક સુરક્ષા વચ્ચે રસી એરપોર્ટ પર રવાના કરી
મંગળવારે વહેલી સવારે સીરમ ઇન્સ્ટિટ્યૂટની સુરક્ષા વચ્ચે આ રસી એરપોર્ટ પર લઈ જવામાં આવી હતી. આ ટ્રકોમાં વેક્સીનને રાખવા માટે કોલ્ડ સ્ટોરેજ બનાવવામાં આવ્યું છે. જેનું તાપમાન 3 ડિગ્રી સુધી રાખવામાં આવ્યું. કોવિશિલ્ડ રસીને પુણે એરપોર્ટથી 8 ફ્લાઇટ્સ દ્વારા વિવિધ સ્થળોએ રવાના કરવામાં આવી છે.
સીરમ ઈન્સ્ટિટ્યૂટથી આ રીતે રવાના થઈ વેક્સીન

8 ફ્લાઇટ દ્વારા 13 સ્થળોએ મોકલાઈ રસી
રસીના હવાઈ પરિવહન પર નજર રાખનારી કંપની એસબી લોજિસ્ટિક્સના એમડી સંદીપ ભોંસલેએ જણાવ્યું હતું કે, કોવિશિલ્ડ રસી કુલ 8 ફ્લાઇટ્સ દ્વારા દેશના 13 સ્થળો પર મોકલવામાં આવશે. પહેલી ફ્લાઈટ દિલ્હીની હતી. પુણેના ડીસીપી નમ્રતા પાટિલના જણાવ્યા અનુસાર, રસીની પહેલી ખેપ સલામતી અને સુવિધા સાથે મોકલવામાં આવી છે. જેના માટે પોલીસે વ્યાપક સુરક્ષા બંદોબસ્ત ગોઠવી દીધો હતો.
બજારમાં કોવિશિલ્ડ રસીના ભાવ શું છે
કેન્દ્ર સરકારે કોવિશિલ્ડના 1.1 કરોડ ડોઝ ખરીદવાનો આદેશ આપ્યો છે. કોવિશિલ્ડના પ્રથમ 10 કરોડ ડોઝ 200 રૂપિયા દીઠ આપવામાં આવશે. માર્કેટમાં ડોઝ દીઠ વેક્સીન 1000 રૂપિયાના દરે મળશે. સીરમના સીઇઓ અદાર પૂનાવાલાએ કહ્યું કે તેમની કંપની દર મહિને પાંચથી છ કરોડ રસી ડોઝ તૈયાર કરી રહી છે.
પ્રથમ તબક્કામાં ત્રણ કરોડ લોકોને અપાશે રસી
DCGIએ પુણેની સીરમ ઇન્સ્ટિટ્યૂટમાં તૈયાર કરેલી ઓક્સફર્ડ-એસ્ટ્રાઝેનેકા રસી 'કોવિશિલ્ડ' અને ભારત બાયોટેકની 'કોવાક્સિન'ના ઇમરજન્સી ઉપયોગને મંજૂરી આપી છે. પ્રથમ તબક્કામાં ત્રણ કરોડ લોકોને રસી આપવામાં આવશે. જેમાં આરોગ્ય કર્મચારીઓ, બીજા ફ્રન્ટલાઈન વર્કર્સ અને ઉચ્ચ જોખમ ધરાવતા લોકો એટલે કે વૃદ્ધોનો સમાવેશ થશે.