'બેગ તો નહીં ખોલવા દઉં..' 'પ્રસાદ' છૂપાવવા કસ્ટમ ઓફિસરની એરપોર્ટ પર મોટી બબાલ

બેંગલુરુ: લખનઉની ફ્લાઈટ પકડવા જઈ રહેલા એક ઓફ ડ્યૂટી કસ્ટમ ઓફિસરે પોતાની કેબિન બેગને સિક્યોરિટી ચેક માટે ખોલવાનો ઈનકાર કરતાં બેંગલુરુના કેમ્પેગૌડા ઈન્ટરનેશનલ એરપોર્ટ પર જોરદાર ડ્રામા સર્જાો હતો. મંગળવારે સવારે કસ્ટમના આ અધિકારી પોતાની પત્ની સાથે લખનઉ જઈ રહ્યા હતા. પોતાની બેગ ખોલવાનો ઈનકાર કરતા તેમણે ઝઘડો શરુ કર્યો ત્યારે લાઈનમાં ઉભેલી તેમની પત્નીને પણ ચક્કર આવી ગયા, અને તે પણ અચાનક રેસ્ટરુમ તરફ ભાગવા લાગી.

સિક્યોરિટીના કારણસર બેગ તો ચેક કરવી જ પડશે તેવું CISF દ્વારા સ્પષ્ટ કરી દેવાતા કસ્ટમના આ અધિકારી પરસેવે રેબઝેબ થઈ ગયા હતા. આખરે તેમની બેગ ખોલવામાં આવી ત્યારે અંદરથી જે નીકળ્યું તે જોઈને એરપોર્ટનો સિક્યોરિટી સ્ટાફ પણ ચોંકી ગયો હતો. આ અધિકારી બેગમાં 74 લાખ કેશ, મોંઘાદાટ મોબાઈલ ફોન્સ અને જ્વેલરી લઈને લખનઉ જઈ રહ્યા હતા.

ચેકિંગ તો થશે જ તેવું સ્પષ્ટ થઈ જતાં આ અધિકારીની પત્ની રેસ્ટરુમમાં દોડી ગઈ હતી. જોકે, તેની પાસે રહેલી બેગ પણ સિક્યોરિટી સ્ટાફે તપાસી તો તેમાંથી પણ 10 લાખ રુપિયા કેશ અને બે આઈફોન નીકળ્યા.

એરપોર્ટના સૂત્રોએ ટાઈમ્સ ઓફ ઈન્ડિયાને જણાવ્યું હતું કે, આ તમાશો મંગળવારે સવારે સાડા નવ વાગ્યે થયો હતો. જે કસ્ટમ ઓફિસર પાસેથી માતબર કેશ મળી છે તેમની ઓળખ મોહમ્મદ ઈરફાન અહેમદ તરીકે કરવામાં આવી છે, અને તેઓ ચેન્નૈમાં કસ્ટમ્સ સુપ્રિન્ટેન્ડેન્ટ તરીકે ફરજ બજાવે છે. તેમની પત્નીની ઓળખ મુમતાઝ તહઝીમ તરીકે કરવામાં આવી છે.

કસ્ટમના આ અધિકારી પોતાની પત્ની સાથે સિક્યોરિટી ચેકમાં ગડબડ કરીને ફ્લાઈટ પકડવા જતા હતા. તે જ વખતે CISFના અધિકારીઓનું ધ્યાન તેમના પર પડ્યું હતું અને તેમણે બેગ ચકાસવા માટે માગી હતી. જોકે, કસ્ટમ ઓફિસરે બેગ નહીં ખોલવા દઉં તેમ કહીને ઝઘડો કરવાનું શરુ કર્યું હતું. તેણે પોતાના હોદ્દાનો પાવર બતાવીને સિક્યોરિટી સ્ટાફને દબાવવાનો પ્રયાસ પણ કર્યો હતો. જોકે, CISFના અધિકારીઓએ તેમને બેગ ખોલવાની ફરજ પાડતા તેમાંથી માતબર કેશ નીકળી હતી, અને કસ્ટમના અધિકારી આ કેશ ક્યાંથી આવી તેનો કોઈ હિસાબ નહોતા આપી શક્યા.