એક અનોખા લગ્ન : કન્યા જાન લઈ વરરાજાને ઘરે ગઈ, બંધારણની સાક્ષીએ લેવાયા વચન અને ફેરા!

અલવર: રાજસ્થાનમાં એક અનોખા લગ્ન યોજાયા, જેમાં પૈસાનો ખર્ચ અટકવવાની સાથે-સાથે લોકો સુધી સામાજિક સંદેશ પહોંચાડવાનો પણ હતો. લગ્નમાં કન્યા રથ પર જાન લઈને વરરાજાના ઘરે પહોંચી. આયોજન સ્થળ પર કોઈ પંડિત પાસે નહીં પણ બંધારણને સાક્ષી માનીને વચન અને ફેરા લેવામાં આવ્યા. મહેમાનો પાસેથી ગિફ્ટ લેવાને બદલે નવ પરિણીત યુગલે પોતાના ગામમાં સાર્વજનિક લાઈબ્રેરી માટે પુસ્તકો લીધા. આટલું જ નહીં, લગ્ન પૂર્ણ રીતે પ્લાસ્ટિક ફ્રી હતું અને મહેમાનોને બંધારણની એક કૉપી અને છોડ શુકન રૂપે આપવામાં આવ્યા. આ લગ્ન અલવર શહેરથી 20 કિમી દૂર કરોલી ગામમાં થયા જ્યારે હૈદરાબાદની એક પ્રાઈવેટ કંપનીમાં કામ કરનારા અજય જાટવ અને બબીતા લગ્નના તાંતણે બંધાયા. અજયના ઘરે રથમાં સવાર થઈને પહોંચેલી બબીતાએ જણાવ્યું કે, ‘અજય અને હું લિંગ સમાનતાનો સંદેશ આપવા માટે કંઈક નવું કરવા માગતા હતા. અમે અમારા લગ્ન દ્વારા એક સોશિયલ મેસેજ આપવા માગતા હતા. હું ખુશ છું અમારા પરિવારના લોકોએ અમારા આઈડિયાને પરવાનગી આપી અને હવે લોકો આ વિશે વાત કરી રહ્યાં છે. મને આશા છે કે, અમે ઘણા લોકોને આવું કરવા માટે પ્રોત્સાહિત કર્યા હશે.’ લગ્નમાં આંબેડકર અને ગૌતમ બુદ્ધની તસવીરો બબીતા જે રથ પર સવાર થઈ વરરાજાના ઘરે જાન લઈને પહોંચી, તેમાં એક તરફ આંબેડકર અને બીજી તરફ ગૌતમ બુદ્ધની તસવીર લાગી હતી. ઘણા લોકોનું કહેવું હતું કે, આ તે વિસ્તારમાં એક દલિત યુગલ દ્વારા આપવામાં આવેલો પાવરફુલ મેસેજ હતો જ્યાં દલિતોના ઘોડા પર બેસવા અંગે જ વિવાદ અને મારપીટ થઈ ચૂક્યા છે. આ ઉપરાંત લગ્ન સમારંભમાં યુગલે બંધારણની કૉપી હાથમાં લઈને વચન લીધું. બાદમાં બંધારણની કૉપીઓ મહેમાનોમાં પણ વહેંચવામાં આવી. યુગલે કરોલીમાં લાયબ્રેરી માટે 30 હજાર રૂપિયાના પુસ્તકો પણ ભેંટમાં આપ્યા. ગામના સરપંચ રાજૂ પંડિતે કહ્યું કે, ‘અજય અને બબીતાએ લાયબ્રેરીની સાચવણી માટે પણ પૈસા આપ્યા છે જેને ટૂંક સમયમાં જ અહીં એક સરકારી બિલ્ડીંગમાં ખોલવામાં આવશે.’ તેમણે કહ્યું કે, લગ્નમાં દરેક બાબત યૂનીક હતી.