Loksabha Election: શું અભિષેક બચ્ચન મારશે રાજનીતિમાં એન્ટ્રી? સપાની ટિકીટ પર આ બેઠક પરથી લડી શકે છે ચૂંટણી

લોકસભા ચૂંટણી 2024ને લઈને રાજકીય પાર્ટીઓએ તૈયારીઓ શરૂ કરી દીધી છે. તો હવે કઈ બેઠક પર કયો ઉમેદવાર ફેટ બેસશે તેને લઈને પણ તમામ જાતીય સમીકરણને જોતા મંથન ચાલી રહ્યું છે. આ તમામની વચ્ચે ચર્ચાઓનું બજાર પણ ગરમ છે. કારણ કે, સમાચાર એવા મળી રહ્યા છે કે, આ વખતે ચૂંટણીમાં બોલિવુડ અભિનેતા અમિતાભ બચ્ચનો પુત્ર અભિષેક બચ્ચન પણ રાજનીતિમાં પગ મૂકી શકે છે. અભિષેકના પિતા અમિતાભ બચ્ચન ઇલાહાબાદથી સાંસદ રહી ચૂક્યા છે. જ્યારે તેની માતા જયા બચ્ચન પણ અત્યારે સપાનાં રાજ્યસભા સાંસદ છે.

સપાએ નથી કરી પુષ્ટિ
આપને જણાવી દઈએ કે, અભિષેક બચ્ચને ચૂંટણી લડશે તેવા સમાચારના કારણે બજાર ગરમાયું છે. એવો અંદાજ લગાવવામાં આવી રહ્યો છે કે, અભિષેક ઉત્તરપ્રદેશથી રાજનીતિમાં પગ મુકશે. સૂત્રોના મતે, અભિષેક બચ્ચન અલ્હાબાદ બેઠક પરથી સમાજવાદી પાર્ટીની ટિકીટ પર લોકસભા ચૂંટણી લડી શકે છે. જોકે, અત્યારે આ અંગે સપાએ કોઈ પણ પ્રકારની સત્તાવાર પુષ્ટિ નથી કરી કે અભિષેક બચ્ચન અલ્હાબાદ લોકસભા બેઠક પરથી 2024માં સપાનો ઉમેદવાર રહી શકે છે. આપને જણાવી દઈએ કે, હાલમાં જ સપાના પ્રમુખ અખિલેશ યાદવ મુંબઈ પ્રવાસ પર પણ ગયા હતા.

અભિષેકની ચૂંટણી લડવા અંગે સપાએ શું કહ્યું?
અલ્હાબાદથી અભિષેક બચ્ચને ચૂંટણી લડવા અંગે સમાજવાદી પાર્ટીના પ્રવક્તા ફખરૂલ હસન ચાંદે કહ્યું હતું કે, અભિષેકની માતા જયા બચ્ચન સપાથી રાજ્યસભા સાંસદ છે. તેમનો પરિવાર સમાજવાદી છે અને સમાજવાદી વિચારદારાને માનનારા છે. તેવામાં અભિષેક બચ્ચને ચૂંટણી લડવાનો નિર્ણય પાર્ટી પ્રમુખ અખિલેશ યાદવ અને સપા નેતૃત્વ કરશે. સપાના પ્રવક્તાએ એ પણ કહ્યું હતું કે, જો અભિષેક ચૂંટણી લડશે તો સારું રહેશે અને તેઓ સારી રીતે ચૂંટણી લડશે. તેના પિતા અમિતાભ બચ્ચન પણ ચૂંટણી લડી ચૂક્યા છે. આપને જણાવી દઈએ કે, અલ્હાબાદ બેઠક પર વર્તમાન સમયમાં રીટા બહુગુણા જોષી ભાજપનાં સાંસદ છે. તેઓ પૂર્વ મુખ્યમંત્રી હેમવતી વંદનના પુત્રી છે. હેમવતી વંદનને અભિનેતા અમિતાભ બચ્ચન ચૂંટણીમાં મ્હાત આપી ચૂક્યા છે.

અમિતાભ બચ્ચન પણ લડ્યા હતા ચૂંટણી
અમિતાભ બચ્ચન ઉત્તરપ્રદેશના અલાહાબાદમાં જન્મ્યા હતા. તેમના પિતા ડો. હરિવંશ રાય બચ્ચન પ્રસિદ્ધ હિન્દી કવિ હતા. અમિતાભ હરિવંશરાય બચ્ચનના 2 પુત્રમાંથી મોટા પુત્ર છે. તેમના બીજા પુત્રનું નામ અજિતાભ છે. જ્યારે વર્ષ 1984માં અભિનયથી બ્રેક લીધા બાદ અમિતાભ બચ્ચને જૂના મિત્ર રાજીવ ગાંધીના સપોર્ટમાં રાજનીતિમાં એન્ટ્રી કરી હતી. તેમણે અલ્હાબાદ લોકસભા બેઠક પરથી ઉત્તરપ્રદેશનાં પૂર્વ મુખ્યમંત્રી હેમવતી વંદન બહુગુણા સામે ચૂંટણી લડી હતી. ત્યારે અમિતાભ બચ્ચને તેમને મ્હાત આપી સાંસદ બન્યા હતા, પરંતુ કાર્યકાળ પૂરો થતા પહેલાં જ અમિતાભ બચ્ચને રાજીનામું આપી દીધું હતું. જ્યારે અત્યારના સમયમાં બીગબીનાં પત્ની અને અભિષેક બચ્ચનની માતા જયા બચ્ચન સમાજવાદી પાર્ટી સાથે સંકળાયેલાં છે.