જુલાઈ પછી પહેલીવાર એક સપ્તાહમાં સૌથી ઓછા 2.9 લાખ નવા કોરોના કેસ

નવી દિલ્હીઃ ભારતમાં રવિવારે 30,000થી થોડા વધુ કોવિડ -19 કેસો નોંધાયા છે, જે 155 દિવસમાં સૌથી ઓછો એક દિવસનો આંકડો છે. મુખ્યત્વે ઓછું પરીક્ષણ અને દિવાળીના તહેવારોના કારણે આટલો ઓછો આંકડો આવ્યો છે. તેમજ કોરોના વાયરસથી મૃત્યુનો આંકડો 426 હતી, જે 163 દિવસમાં સૌથી ઓછો છે.

ગયા અઠવાડિયાની શરુઆતમાં વધારો નોંધાવ્યા પછી સપ્તાહ દરમિયાન કોવિડ -19 કેસ અને મૃત્યુના કિસ્સાઓમાં પણ તીવ્ર ઘટાડો થયો હતો. 8થી 15 નવેમ્બર એક સપ્તાહમાં સમગ્ર ભારતમાં 2,92,549 કેસોનો ઉમેરો થયો છે, જે ગયા સપ્તાહે 1-8 નવેમ્બર દરમિયાન નોંધાયેલા 3,25,555 કેસની દ્રષ્ટીએ તીવ્ર ઘટાડો છે. આ સાથે જ જુલાઈ પછી સૌથી ઓછા સાપ્તાહિક કેસ છે.

બીજી તરફ ગુજરાતમાં ફરી એકવખત મોટા શહેરોમાં કોરોના વાયરસના કેસોમાં સતત વધારો નોંધાયો છે. ગુજરાતમાં છેલ્લા 24 કલાકમાં કોરોના વાયરસના નવા 1070 કેસ નોંધાયા છે. ગુજરાતમાં અત્યાર સુધીમાં નોંધાયેલા કોરોના વાયરસના કેસનો કુલ આંકડો 188310 પર પહોંચ્યો છે. ગુજરાતમાં છેલ્લા 24 કલાકમાં કોરોનાના વધુ 1001 દર્દીઓ સાજા થઈને ઘરે પરત ફર્યા છે. રાજ્યમાં કોરોનાના વધુ 6 દર્દીઓના મોત થતા કુલ મૃત્યુઆંક 3803 થયો છે. રાજ્યમાં કોરોના વાયરસને હરાવીને સાજા થવાનો દર 91.30% નોંધાયો છે.