'બાબા કા ઢાબા' બાદ હવે 80 વર્ષીય 'રોટલીવાળા અમ્મા' જોઈ રહ્યા છે મદદની રાહ

આગ્રા, ઉત્તરપ્રદેશ: દિલ્હીના 'બાબા કા ઢાબા'વાળા વૃદ્ધ કપલની કરૂણ સ્ટોરી બાદ હવે આગ્રાના રોટીવાળા અમ્માનો વિડીયો સોશિયલ મીડિયા પર વાયરલ થઈ રહ્યો છે. 80 વર્ષીય વૃદ્ધ મહિલા રસ્તાની પાસે બેસીને રોટલી બનાવે છે. માત્ર રૂપિયા 20માં ભરપેટ ભોજન કરાવતા અમ્માની કમાણી પર કોરોનાની અસર પડી છે. તેમના પતિના નિધન બાદ દીકરાએ ઘરમાંથી કાઢી મૂકતા તેઓ આત્મનિર્ભર બન્યાં છે.

તેઓ એક વૃક્ષની નીચે બેસીને રોટલી-શાક બનાવીને વેચે છે. ત્યાં આસપાસના રિક્શાવાળા, મજૂરો અને અન્ય કારીગરો જમવા માટે આવે છે. તેઓ માત્ર 20 રૂપિયામાં ભરપેટ ભોજન કરાવે છે. તેમની થાળીમાં રોટલી અને શાક હોય છે માટે આસપાસના લોકો તેઓને રોટલીવાળા અમ્મા તરીકે સંબોધિત કરે છે.

છેલ્લા 15 વર્ષથી તેઓ આ કામ સંભાળી રહ્યા છે અને ગરીબ વ્યક્તિ આવે ત્યારે તેની પાસેથી પૈસા લીધા વિના જમાડે છે. આસપાસના વિસ્તારોમાં પણ તેઓ રોટલીવાળા અમ્માના નામથી પ્રખ્યાત છે. ભગવાન દેવી નામના આ વૃદ્ધાએ જણાવ્યું કે લોકડાઉન દરમિયાન તેઓને ઘણી સમસ્યાનો સામનો કરવો પડ્યો. હવે ધીરે-ધીરે લોકો આવી રહ્યા છે પણ પહેલા કરતા ઓછી સંખ્યા જોવા મળી રહી છે.

આ અમ્માએ જણાવ્યું કે લોકડાઉન પહેલા દિવસના રૂપિયા 200થી 400ની કમાણી થતી હતી પણ હવે દિવસ દરમિયાન માંડ રૂપિયા 100ની કમાણી થાય છે. મારા દીકરાએ મને ઘરમાંથી તગેડી મૂકી પણ હું હાર માની નહીં. જ્યાં સુધી મારા હાથ-પગ ચાલશે ત્યાં સુધી હું કામ કરીશ.