વિરોધ પ્રદર્શન બંધ કરવાના બદલામાં માગ્યા રૂપિયા, આગ્રા જિલ્લા કોંગ્રેસ પ્રમુખનો વિડીયો વાઈરલ

આગ્રા: ઉત્તર પ્રદેશના આગ્રા જિલ્લા કોંગ્રેસના મહિલા પ્રમુખનો એક વિડીયો સોશિયલ મીડિયામાં વાઈરલ થઈ રહ્યો છે. જેના કારણે કોંગ્રેસ માટે શરમજનક સ્થિતિ ઊભી થઈ છે. આ વિડીયોમાં જિલ્લા પ્રમુખ મનોજ દિક્ષિત વિરોધ પ્રદર્શન બંધ કરવા માટે દર મહિને 3 લાખ રૂપિયા આપવાનું કહેતા વિડીયોમાં જોવા મળી રહ્યાં છે.

કથિત રીતે ગત 15 ઓગસ્ટે કોંગ્રેસના આગ્રા જિલ્લાના જનરલ સેક્રેટરી શાહિદ અહમદના ઘરે રેકોર્ડ કરાયો હોવાનો કહેવાતા આ વિડીયોમાં દિક્ષિત ડીલ નક્કી કરવા માટે 5 લાખ રૂપિયા એડવાન્સ માગી રહ્યાંનું સંભળાઈ રહ્યું છે. કથિત રીતે દિક્ષિત એવું પણ કહેતાં સંભળાઈ રહ્યા છે કે, 'રૂપિયા મળ્યા બાદ કોંગ્રેસ ડિસ્કોમ સામે માત્ર દેખાવ પુરતો વિરોધ કરશે, જેથી લોકોનું સમર્થન મળતું રહે.'

આ મામલાને ગંભીરતાથી લેતા ઉત્તર પ્રદેશ કોંગ્રેસ કમિટી (UPCC) ચીફ અજય લલ્લુએ તપાસના આદેશ આપ્યા છે. દરમિયાનમાં આ વિડીયો સામે આવ્યા બાદ દિક્ષિત અને અહમદ બંનેએ રાજીનામા આપી દીધા છે, જે સ્વીકારી લેવામાં આવ્યા છે.

લોકડાઉનના ત્રણ મહિનાનું વિજ બિલ માફ કરવાની સ્થાનિકોની માગનું સમર્થન કરતા કોંગ્રેસે ગત 21 જુલાઈએ ટોરેન્ટની ઓફિસને મોટું વિરોધ પ્રદર્શન કર્યું હતું. બાદમાં, સાત કાર્યકારો સાથે તેમની ધરપકડ કરવામાં આવી હતી.

વિરોધ પ્રદર્શન દ્વારા ડિસ્કોમ પાસેથી રૂપિયા પડાવવાનો આરોપ લગાવતા ભાજપના શહેર પ્રદેશ પ્રમુખ ભાનુ મહાજને કહ્યું કે, 'આ વિડીયોએ પાર્ટીમાં ચાલતા ભ્રષ્ટાચારને જાહેર કર્યો છે. આ નેતાઓ ડિસ્કોમ સામે માત્ર પોતાના માગો પૂરી કવા વિરોધ પ્રદર્શન કરી રહ્યા છે. તેમને લોકોની જરાય ચિંતા નથી.'

દરમિયાનમાં, રવિવારે સવારે દિક્ષિતે એક વિડોયો રિલીઝ કર્યો હતો, જેમાં તેમણે પોતે નિર્દોષ હોવાનું જણાવ્યું હતું. તેમણે કહ્યું હતું કે, તેમને ટાર્ગેટ બનાવવામાં આવ્યા છે. ટોરેન્ટ પાવરના જનસંપર્ક અધિકારી ભુપેન્દ્ર સિંહે જણાવ્યું કે, 'અમારે આ સમગ્ર મામલે કંઈ લેવા-દેવા નથી. કોંગ્રેસના જિલ્લા પ્રમુખને મળવા કંપનીએ કોઈને નથી મોકલ્યા. અમારો તેમની સાથે કોઈ સંબંધ નથી.'