આગ્રા ડોક્ટર મર્ડર: સ્ટેચ્યૂ ગેમથી 8 વર્ષની પુત્રી અને 4 વર્ષના પુત્રનો જીવ બચી ગયો

આગ્રા: ઉત્તર પ્રદેશના આગ્રામાં ડેન્ટલ સર્જન મર્ડર કેસે બધાને ચોંકાવી દીધા છે. આરોપી શુભમે ડૉક્ટરને ચપ્પુના ઘા ઝીંકીને નિર્મમ હત્યા કરી હતી. જો કે, ડૉક્ટરની દીકરીએ આવા સમયમાં પણ પોતાનો અને એક બાળકનો જીવ બચાવી લીધો હતો. ઘટના દરમિયાન તેણીએ તેના ભાઈને સ્ટેચ્યૂ (ગેમ)નો ઈશારો કર્યો હતો અને બાદમાં બંનેએ બેભાન થવાનું નાટક કર્યું. શુભમને લાગ્યું કે તેઓ મરી ગયા છે અને તે ત્યાંથી જતો રહ્યો હતો.

ડૉક્ટર નિશાની પુત્રી અનિશા (8) અને પુત્ર અદવય (4) આ ઘટનાની નજરે સાક્ષી છે. પોલીસે શનિવારે એક એન્કાઉન્ટરમાં આરોપી શુભમને પકડ્યો હતો. આરોપીના પગમાં ગોળી વાગી છે. તેને હોસ્પિટલમાં દાખલ કરવામાં આવ્યો છે. અહીં પૂછપરછ દરમિયાન બાળકોએ ઘટનાની આંખો દેખી તમામ વિગતો જણાવતા પોલીસકર્મીઓએ બાળકોની સમજણના વખાણ કર્યા હતા.

રૂમથી બહાર આવ્યા તો માતાને જોઈને સ્તબ્ધ થઈ ગયા
અનિશાએ જણાવ્યું કે ઘરમાં કેબલ ચાલી રહ્યું નહોતું. માતાએ શુભમને ફોન કર્યો હતો. શુભમ ઘરે આવ્યો ત્યારે બંને બાળકો ઘરના એક રૂમમાં હતા. માતાનો અવાજ સાંભળીને બંને બહાર આવ્યા અને જોયું કે શુભમ તેમની માતા પર છરી વડે હુમલો કરી રહ્યો હતો. આ જોઈને બંને ગભરાઈ ગયા હતા.

બહેને કર્યો સ્ટેચ્યૂનો ઈશારો
અનિશાએ જણાવ્યું કે શુભમ બંને તરફ દોડી આવ્યો અને અદવયના ગળા પર ચપ્પુ રાખ્યું. આ જોઈને અનિશાએ અદવયને સ્ટેચ્યૂ કહી દીધું અને અદવય જમીન પર સૂઈ ગયો. શુભમને લાગ્યું કે તે મરી ગયો છે. ત્યારબાદ તે અનિશા તરફ દોડી ગયો. જ્યારે શુભમે અનિશા પર છરી વડે હુમલો કર્યો ત્યારે તેણીએ પણ બેભાન થઈને નાટક કર્યુ હતું.

બાળક મરી ગયા છે તેવું સમજીને શુભમ ત્યાથી જતો રહ્યો
શુભમે વિચાર્યું કે બંને બાળકો મરી ગયા છે. જેથી તે તેમને ત્યાં જ છોડીને જતો રહ્યો હતો. બંને બાળકો શુભમ જતો રહ્યો ત્યારબાદ દોડીને રૂમના બાથરૂમમાં સંતાઈ ગયા હતા. જ્યારે તેમના પિતાજી ઘરે આવ્યા ત્યારે અવાજથી સાંભળીને બાળકો બૂમ પાડી અને બહાર આવ્યા.