કોરોના વાયરસના નવા સ્ટ્રેનનો ભય, મુંબઈમાં 15 જાન્યુઆરી સુધી બંધ રહેશે દરેક સ્કૂલ

મુંબઈઃ કોરોના વાયરસનો નવો પ્રકાર સામે આવ્યા પછી 15 જાન્યુઆરી સુધી મુંબઈની દરેક સ્કૂલ બંધ કરવાનો નિર્ણય લેવામાં આવ્યો છે. આ પહેલા માત્ર 31 ડિસેમ્બર સુધી સ્કૂલ બંધ કરવાનો નિર્ણય બીએમસી કમિશનરે લીધો હતો. નોંધનીય છે કે સૌથી પહેલા બ્રિટનમાં કોરોના વાયરસનો નવો સ્ટ્રેન મળ્યો હતો. દુનિયાના અનેક દેશોએ બ્રિટનથી આવતી દરેક ઉડાન પણ રદ કરી છે.

અનેક રાજ્ય સ્કૂલ ખોલવાની તૈયારીમાં
દેશમાં જાહેર થયેલા કોરોના સંકટ વચ્ચે અનેક રાજ્યોએ નવા વર્ષમાં સ્કૂલ ખોલવાનો નિર્ણય લીધો છે તો કેટલાક રાજ્ય સુરક્ષાના ભાગ રુપે સ્કૂલને બંધ રાખશે. કર્ણાટક સરકારે એક જાન્યુઆરીથી 10મા અને 12મા ધોરણ માટે સ્કૂલ શરુ કરવાનું કહ્યું હતું.

શું છે અન્ય રાજ્યોની સ્થિતિ?
આસામ સરકારે પહેલી જાન્યુઆરીથી સરકારી સ્કૂલ ખોલવાની જાહેરાત કરી છે. રાજસ્થાન સરકાર ચાર જાન્યુઆરીથી છઠ્ઠા ધોરણથી લઈ 12માં ધોરણ સુધીની સ્કૂલ ખોલવાની તૈયારીમાં છે. બિહારમાં ચાર જાન્યુઆરીથી દરેક સરકારી સ્કૂલ અને કોચિંગ સેન્ટર ખોલવામાં આવશે.

દિલ્હીમાં કેવી છે સ્થિતિ?
દિલ્હીના મુખ્યમંત્રી કહી ચૂક્યા છે કે જ્યાં સુધી વેક્સીન નથી આવતી ત્યાં સુધી દિલ્હીની સ્કૂલ પણ નહીં ખૂલે. મધ્યપ્રદેશમાં 18 ડિસેમ્બરથી સ્કૂલ ખોલવામાં આવ્યા છે. અહીં ધોરણ 9મું અને 11માં ધોરણના વિદ્યાર્થીઓને પણ પેરેન્ટ્સની મંજૂરી સાથે સ્કૂલે આવવાની પરમિશન છે.