કૃષિ બિલોના વિરોધ વચ્ચે મોદી સરકારે ઘઉં સહિત 6 રવિ પાકના ટેકાના ભાવ વધાર્યા

નવી દિલ્હી: કૃષિ બિલના વિરોધની વચ્ચે સરકારે ઘઉંની MSP (મિનિમમ સપોર્ટ પ્રાઈઝ) પર 50 રૂપિયા પ્રતિ ક્વિન્ટલના વધારાની જાહેરાત કરી છે. કૃષિ મંત્રી નરેન્દ્ર સિંહ તોમરે આ જાહેરાત કરી. કૃષિ મંત્રીએ રવિ સીઝનના 6 પાકોની નવી MSP જાહેર કરી છે. ઉલ્લેખનીય છે કે, કૃષિના બે બિલ પાસ થયા બાદ વિપક્ષ જોરદાર વિરોધ કરી રહ્યો છે. તે ઉપરાંત હરિયાણા અને પંજાબના ખેડૂતો મોટી સંખ્યામાં રસ્તા પર ઉતરી આવ્યા છે.

એમએસપી અંગે ખેડૂતોને ખાતરી આપતા પીએમએ કહ્યું હતું કે, 'હું પહેલા પણ કહી ચૂક્યો છું અને ફરી એક વખત કહું છું, MSPની વ્યવસ્થા ચાલુ રહેશે. સરકારી ખરીદી ચાલુ રહેશે. અમે અહીં આપણા ખેડૂતોની સેવા માટે આવ્યા છીએ. અમે અન્નદાતાઓની મદદ માટે શક્ય તમામ પ્રયાસ કરીશું અને તેમની આવનારી પેઢીઓ માટે વધુ સારા જીવનને સુનિશ્ચિત કરીશું.'

કૃષિ મંત્રીએ કહ્યું કે, 'ખેડૂતોના હિતમાં મોદી સરકારે વધુ એક નિર્ણય લીધો છે. લઘુત્તમ સમર્થન મૂલ્ય પર ખરીદી ચાલુ રહેશે અને વધેલી કિંમતોથી ખેડૂતોને 106 ટકા સુધીનો લાભ થશે. ઘઉંનો ટેકાનો ભાવ 1975 રૂપિયા પ્રતિ ક્વિન્ટલ જાહેર કરાયો છે. ઘઉંના ટેકાના ભાવમાં 50 રૂપિયા પ્રતિ ક્વિન્ટલનો વધારો કરાયો છે.'

તોમરે કહ્યું કે, 'ચણાનો ટેકાનો ભાવ 5100 રૂપિયા પ્રતિ ક્વિન્ટલ જાહેર કરાયો છે. ચણાના ટેકાના ભાવમાં 225 રૂપિયા પ્રતિ ક્વિન્ટલનો વધારો કરાયો છે. તે ઉપરાંત જઉંનો ટેકાનો ભાવ 1600 રૂપિયા પ્રતિ ક્વિન્ટલ જાહેર થયો છે અને 75 રૂપિયા પ્રતિ ક્વિન્ટલનો વધારો કરાયો છે. મસૂરનો ટેકાનો ભાવ 5100 રૂપિયા પ્રતિ ક્વિન્ટલ જાહેર કરાયો છે. સરસવ તેમજ તેલીબિયાંનો ટેકાનો ભાવ 4650 રૂપિયા પ્રતિ ક્વિન્ટલ જાહેર થયો છે.'

કૃષિ મંત્રીએ કહ્યું કે, 'વર્ 2013-14માં ઘઉંની MSP 1400 રૂપિયા હતી, જે 2020-21માં વધીને 1975 રૂપિયા થઈ ગયો. એટલે કે એમએસપીમાં 41 ટકાનો વધારો થયો. 2013-14માં અનાજની એમએસપી 1310 રૂપિયા હતી, જે 2020-21માં વધીને 1868 રૂપિયા થઈ ગઈ. 2013-14માં મસૂરની એમએસપી 2950 રૂપિયા હતી, જે 2020-21માં વધીને 5100 રૂપિયા થઈ ગઈ. 2013-14માં અડદની એમએસપી 4300 રૂપિયા હતી, જે 2020-21માં વધીને 6000 રૂપિયા થઈ ગઈ.'