2019 ઈલેક્શન: અમિત શાહનો માસ્ટર પ્લાન તૈયાર

રવીશ તિવારી, નવી દિલ્હી: ભારતીય જનતા પાર્ટીના અધ્યક્ષ અમિત શાહે પાર્ટી માટે નબળા વિસ્તારોની 200થી વધારે સીટોમાંથી 115ની ઓળખ 2019માં થનારા ઈલેક્શન માટે જીતવા યોગ્ય સીટો તરીકે કરી છે. જો પાર્ટીના પારંપરિક ગઢના પ્રદર્શનમાં કોઈ ચુક આવે અથવા સીટો આઘી-પાછી થાય તો તેની ભરપાઈ માટે આ લોકસભાની સીટોની ઓળખ કરવામાં આવી છે.

બીજેપી સાથે જોડાયેલા સૂત્રોએ જણાવ્યું કે અમિત શાહે આંધ્ર પ્રદેશ, કેરળ, પૂર્વોત્તર ભારત, ઓડિશા, તેલંગાના, તમિલનાડુ અને પશ્ચિમ બંગાળમાં સર્વે તેમજ ફીડબેકના આધારે સીટોની ઓળખ કરવામાં આવી છે. આ વિસ્તારોથી 200થી વધારે સભ્યો લોકસભામાં આવે છે અને શાહે પોતાના સર્વેના આધારે વિશેષ સંભવિત સીટોની ઓળખ કરી છે.

પાર્ટી સાથે જોડાયેલા સૂત્રો દ્રારા જાણવા મળ્યું છે કે 23 ઓગષ્ટના રોજ ઓલ સ્ટેટ કોર ગ્રુપ્સ મીટિંગમાં સંબંધિત રાજ્યોના નેતાઓ સાથે સીટોની ઓળખ કરવામાં આવી હતી. અમિત શાહે ખાસ સીટો પર ફોકસ કરવા માટે તે વિસ્તારોના સ્ટેટ કોર ગ્રુપ મેમ્બર્સ સાથે એક અલગ મીટિંગ કરી હતી. પોતાના એક્શન પ્લાનને આગળ વધારવા માટે આ રાજ્યોના વરિષ્ઠ નેતાઓ સાથે લગભગ 2 કલાક વિતાવ્યા હતા. એક સંદર્ભમાં સૂત્રએ જણાવ્યું કે, શાહે આ જવાબદારી સ્ટેટ કોર ગ્રુપ્સ તેમજ મુરલીધર રાવ, અરુણ સિંહ, સિદ્ધાર્થ નાથ સિંહ અને મહેન્દ્ર નાથ સિંહ જેવા સ્ટેટ ઈનચાર્જને સોંપી છે. બીજેપી નેતાઓનું કહેવું છે કે આ વિસ્તારો સુધી પહોંચવા માટે પાર્ટીના લોન્ગ ટર્મ પ્લાનનો ભાગ છે.