UP: IFFCO પ્લાન્ટમાં ગેસ લીકેજ થતાં બે અધિકારીના મોત, 15ની હાલત ગંભીર

આનંદરાજ, પ્રયાગરાજ: યુપીના પ્રયાગરાજમાં ઇફ્કો પ્લાન્ટ (IFFCO Plant Gas Leakage)માં મોટો અકસ્માત થયો છે. યુરીયા બનાવતા પ્લાન્ટમાં મોડી રાત્રે એમોનિયા ગેસ લીક થતાં હોબાળો મચી ગયો હતો. આ અકસ્માતમાં બે અધિકારીઓનાં મોત નીપજ્યાં છે. બે ડઝન કામદારો ગેસ લીકેજ થવાના કારણે બીમાર પડ્યા છે. તમામને હોસ્પિટલમાં દાખલ કરવામાં આવ્યા છે. ગેસ લીકેજનો ભોગ બનેલા 15 લોકોની હાલત ગંભીર છે. આ અકસ્માતમાં પ્લાન્ટના સહાયક મેનેજર બી.પી.સિંઘ અને ડેપ્યુટી મેનેજર અભિનંદનનું મોત નીપજ્યું હતું.

100 કર્મચારી નાઇટ શિફ્ટમાં કામ કરતા હતા
તમને જણાવી દઈએ કે, જ્યારે આ ઘટના બની ત્યારે 100 કર્મચારીઓ પ્લાન્ટમાં કામ કરી રહ્યા હતા. અચાનક ગેસ લીકેજ થતાં કંપનીમાં દોડધામ મચી હતી. ઘણા કર્મચારીઓ એમોનિયાની ઝપેટમાં આવી જતાં ત્યાં જ ઢળી પડ્યા હતા. તબીબી ટીમે દરેકને સારવાર માટે તાત્કાલિક હોસ્પિટલ ખસેડ્યા હતા.

એશિયા લેવલની યૂરિયા ઉત્પાદન કંપની છે ઈફ્કો
ઇફ્કો (ઈન્ડિયન ફાર્મર્સ એન્ડ ફર્ટિલાઈઝર કો-ઓપરેટિવ લિમિટેડ)નું ફૂલપુર ખાતે એક પ્લાન્ટ છે, જે પ્રયાગરાજની જિલ્લા મેજિસ્ટ્રેટ ઓફિસથી માત્ર 40 કિલોમીટર દૂર છે. આ કંપની એશિયાની ટોપ કંપનીઓમાં ગણાય છે. કંપની મંગળવારે મોડી રાત્રે 12 વાગ્યે કાર્યરત હતી. તે જ સમયે, એમોનિયા ગેસ લીક થવા લાગ્યો. કંપનીમાં નાઇટ શિફ્ટમાં લગભગ 100 કર્મચારીઓ અને ઘણા અધિકારીઓ ફરજ પર હતા.

પંપ લીકેજને કારણે અકસ્માત થયો હોવાની આશંકા
બનાવની ગંભીરતા જોઈને જિલ્લા વહીવટી તંત્રના ઉચ્ચ અધિકારીઓ ઘટનાસ્થળે પહોંચી ગયા હતા અને અકસ્માતની તપાસ શરૂ કરી હતી. લીકેજ થવા પાછળનું કારણ હજી સ્પષ્ટ થયું નથી. તેમ છતાં, એવું અનુમાન છે કે પ્લાન્ટના પંપમાંથી લીકેજ થવાને કારણે અકસ્માત થયો છે. આ ઘટનામાં પણ બેદરકારીની વાત કરવામાં આવી રહી છે. અધિકારીઓ હાલમાં સમગ્ર ઘટનાની તપાસ કરી રહ્યા છે. ઇફ્કોનાં પીઆરઓ (જનસંપર્ક અધિકારી) વિશ્વજીતે બે અધિકારીઓનાં મોતની પુષ્ટિ કરી છે.

બે વર્ષમાં 5 વખત બની ગેસ લીકેજની ઘટના
પ્રયાગરાજના ફૂલપુર વિસ્તારમાં આવેલા ઇફ્કો પ્લાન્ટમાં ગેસ લીકેજની ઘટના પહેલીવાર નથી બની. એવું કહેવામાં આવી રહ્યું છે કે છેલ્લા 2 વર્ષમાં આવી 5 ઘટનાઓ બની છે. જો કે, પ્લાન્ટના કર્મચારીઓ અને અધિકારીઓએ તે સમયે પરિસ્થિતિને કાબૂમાં કરી હતી અને કોઈ અનિચ્છનિય ઘટના બની ન હતી. પરંતુ મંગળવારે રાત્રે બનેલી આ ઘટનામાં બે અધિકારીઓ લીકેજ થવાને કારણે જીવ ગુમાવ્યાં હતાં. જ્યારે ઘણા કર્મચારીઓ જીવન-મરણ વચ્ચે ઝોલા ખાઈ રહ્યા છે. જિલ્લા વહીવટી તંત્ર અને પોલીસની ટીમ ઘટનાસ્થળે પહોંચીને ઈજાગ્રસ્તોને વિવિધ હોસ્પિટલોમાં દાખલ કર્યા છે. સાવચેતીના ભાગરૂપે કંપનીના બે પ્લાન્ટ બંધ કરાયા છે.