આંધ્રના જે કોવિડ કેર સેન્ટરમાં આગ લાગી ત્યાં દર્દી પાસેથી પ્રતિદિન વસુલાતો હતો આટલો ચાર્જ

હૈદરાબાદ: રવિવારના રોજ સવારે આંધ્રના વિજયવાડામાં એક કોવિડ કેર સેન્ટરમાં આગ લાગી હતી. જેમાં કુલ 11 કોરોનાના દર્દીના મોત થયા હતા. સ્વર્ણ પેલેસ નામની એક હોટેલમાં આ કોવિડ કેર સેન્ટર ચાલી રહ્યું હતું. આ હોટેલમાં કુલ 31 દર્દીઓ રાખવામાં આવ્યા હતા. જેઓ પાસેથી દરરોજના રૂપિયા 5 હજાર ચાર્જ કરવામાં આવતા હતા. વાત જાણે એમ છે કે કોરોના વાયરસનું સંક્રમણ ફેલાયા બાદ અહીં હોટેલને કોવિડ કેર સેન્ટરમાં રૂપાંતરિત કરવાનો બિઝનેસ જોરમાં ચાલી રહ્યો છે.

આ હોટેલને એક પ્રાઈવેટ હોસ્પિટલે કોરોનાના દર્દીઓને રાખવા માટે લીઝ પર લીધી હતી. આંધ્રપ્રદેશ અને પાડોશી રાજ્ય તેલંગાણામાં કોવિડ કેર સેન્ટરના રૂપે આ હોટેલનો વ્યવસાય જોરમાં છે. પ્રાપ્ત માહિતી મુજબ તેલંગાણાની સુપર સ્પેશ્યિાલિટી હોસ્પિટલ્સ એસોસિએશનના એક અધિકારીએ જણાવ્યું કે અહીં રહેવા માટેનું પેકેજ પ્રતિ દર્દી 1500 રૂપિયા પ્રતિ દિવસથી શરૂ થાય છે. હોટેલની ક્વોલિટી અનુસાર તે મોંઘું થતું જાય છે. જ્યારે સ્ટાર હોટેલ તો રૂપિયા 5થી 8 હજાર સુધીનો ચાર્જ પ્રતિદિન વસુલી રહ્યા છે. આ તો માત્ર રહેવા માટેનો ખર્ચો છે. ઈલાજનો ખર્ચ અલગથી હોસ્પિટલ વસુલે છે જ્યારે આ તમામ એડવાન્સમાં આપવા પડે છે.

તેલંગાણાના સ્વાસ્થ્યમંત્રીએ કહ્યું કે કેટલાંક કેસોમાં જોવા મળ્યું છે કે તે પ્રાઈવેટ હોસ્પિટલ્સ કે જેમણે હોટેલ્સ સાથે જોડાણ કર્યું છે તેઓ કોરોના વાયરસ પેકેજના નામે વધારે પૈસા વસુલી રહ્યા છે. જ્યારે આંધ્રપ્રદેશના સ્વાસ્થ્યમંત્રીએ કહ્યું કે કોવિડ 19 હોટેલ એક આકર્ષક વ્યવસાય બની ગયો છે. પ્રાઈવેટ હોસ્પિટલ્સ દર્દીઓના ડરનો ફાયદો ઉઠાવીને તેઓ પાસેથી કોવિડ પેકેજના નામે મોટી રકમ વસુલી રહી છે.

જ્યારે આંધ્રપ્રદેશ પ્રાઈવેટ હોસ્પિટલ્સ એન્ડ નર્સિંગ હોમ્સ એસોસિએશનના સચિવ ડો. પી શ્રીનિવાસે આ મુદ્દે વાત કરતા જણાવ્યું કે કોઈ હોસ્પિટલ વધુ ચાર્જ વસુલી રહી નથી.