પ્રથમ સ્વદેશી કોરોના વેક્સિનને મંજૂરી, તો ઉત્તરાયણથી શરૂ થઈ જશે રસીકરણ?

નવી દિલ્હી: આજે નવા વર્ષનો બીજો દિવસ છે અને કોરોના વેક્સિન પર બીજા શુભ સમાચાર આવ્યા છે. એક્સપર્ટ એટલે કે નિષ્ણાતોની પેનલે પ્રથમ દેસી વેક્સિનને ઈમરજન્સી પરિસ્થિતિઓમાં ઉપયોગ માટેની મંજૂરી આપવા માટેની ભલામણ કરી છે. સૂત્રોના જણાવ્યા મુજબ CDSCO (Central Drugs Standard Control Organisation)એ પોતાની ભલામણમાં કહ્યું કે ભારત બાયોટેકની કોવેક્સિન (Bharat Biotech's Covaxin)ને ઉપયોગ માટેની મંજૂરી મળી શકે છે. તેવામાં એવું લગભગ નક્કી થઈ ગયું છે કે તારીખ 14 જાન્યુઆરીથી દેશમાં કોરોના વિરુદ્ધ રસીકરણનું અભિયાન શરૂ થઈ જશે.

આ પહેલા નવા વર્ષના પ્રથમ દિવસ તારીખ 1 જાન્યુઆરી, 2021ના રોજ ઓક્સફર્ડ યુનિવર્સિટી અને એસ્ટ્રેજેનેકા તરફથી વિકસિત કોવીશીલ્ડ (Oxford University and AstraZeneca's Covid vaccine Covishield)ને ભારતમાં ઈમરજન્સી ઉપયોગ માટેની અનુમતિ મળી ગઈ છે. અહીં નોંધનીય છે કે કોવીશીલ્ડનું ઉત્પાદન પણ ભારતીય દવા નિર્માતા કંપની સીરમ ઈન્સ્ટિટ્યૂટ ઓફ ઈન્ડિયા (SII) કરી રહી છે.

મહારાષ્ટ્રના પૂનામાં આવેલી સીરમ ઈન્સ્ટિટ્યૂટ ઓફ ઈન્ડિયા (SII), ઉત્પાદનની દ્રષ્ટિએ દુનિયાની સૌથી મોટી વેક્સિન નિર્માતા કંપની છે. આ પ્રમાણે કોવીશીલ્ડ દેશમાં નિર્મિત વેક્સિન છે જ્યારે કોવેક્સિન દેશમાં વિકસિત અને નિર્મિત એમ બંને છે. જે Indian Council of Medical Research (ICMR)ની મદદથી ભારત બાયોટેકે વિકસિત કરી છે.