57 વર્ષની ઉંમરે પણ જોશ હાઈ, ઘાયલ મહિલાને ખભા પર ઉપાડીને દોડ્યા ASI

મધ્યપ્રદેશના જબલપુરમાં સર્જાયેલા માર્ગ અકસ્માત (Jabalpur accident)માં એક પોલીસકર્મીએ ભરેલા તાત્કાલિક પગલાની ભારે પ્રશંસા થઈ રહી છે. ASI (Assistant Sub Inspector) સંતોષ સેન (Santosh Sen) હોસ્પિટલમાં સ્ટ્રેચર ના મળતા ઘાયલ મહિલાને પોતાના ખભા પર ઉપાડીને દોડ્યા હતા.

જબલપુરમાં મંગળવારે થયેલા માર્ગ અકસ્માતમાં મિની ટ્રક અનિયંત્રિત થઈ જતા પલટી ગઈ હતી, આ અકસ્માતમાં 30-35 ખેત મજૂરો ઘાયલ થયા છે. તમામને સારવાર માટે હોસ્પિટલ ખસેડવામાં આવ્યા છે. આ ઘટના ચરગવાં વિસ્તારમાં થઈ હતી. ઘાયલનો સ્થિતિ હવે સારી છે. ઘટનાની જાણકારી મળતા જ સ્થાનિક પોલીસ અધિકારીઓ તાત્કાલિક ઘટના સ્થળ પર દોડ્યા હતા.

આ મજૂરો ખેતરમાં કામ કરવા માટે જઈ રહ્યા હતા, ત્યારે દુર્ઘટના સર્જાઈ હતી. આ અકસ્માતમાં કોઈ જાનહાનીનો ખતરો નથી બન્યો. અકસ્માત બાદ ડ્રાઈવર ઘટના સ્થળ પરથી ફરાર થઈ ગયો હતો. પોલીસ તેની તપાસ કરી રહી છે. આ કેસમાં પોલીસ દ્વારા કરવામાં આવેલી કાર્યવાહીની પ્રશંસા થઈ રહી છે પરંતુ સંતોષ સેને જે રીતે પોતાની ફરજ નીભાવી છે તે જોઈને લોકો ઘણાં જ ખુશ છે. સોશિયલ મીડિયા પર એવી પણ ચર્ચા થઈ રહી છે કે જો દરેક પોલીસવાળા આવા થઈ જાય તો દેશના ગુનાની સંખ્યામાં ઘટાડો થઈ જાય અને પોલીસ-પ્રજાની મિત્રાતા વધારે ગાઢ બની જાય.


આ ઘટના બાદ ઘાયલોને તાત્કાલિક સારવાર મળી રહે તે માટે હોસ્પિટલમાં લઈ જવાયા હતા, જ્યાં પોલીસનો કાફલો પણ પહોંચ્યો હતો. આ દરમિયાન એક ઘાયલ મહિલા માટે સ્ટ્રેચર ના મળતા 57 વર્ષના સંતોષ જૈન નામના ASI મહિલાને તરત સારવાર મળે તે માટે પોતાના ખભા પર ઉચકીને હોસ્પિટલમાં દોડ્યા હતા. સંતોષ કુમાર સેનનો એક હાથ કામ નથી કરતો આમ છતાં તેમણે હિંમત બતાવી અને મહિલાને હોસ્પિટલની અંદર પહોંચાડવા માટે તાત્કાલિક પગલા ભર્યા. ASI સંતોષ સેનને 2006માં થયેલા અથડામણ દરમિયાન નુકસાન થયું હતું.