11 વર્ષથી રોજ 10 કિમી ચાલી જાય છે બાળકોને ભણાવવા

હુબલી: છેલ્લા 11 વર્ષોથી સુમિત્રા કોલુરુ રોજ 19 કિલોમીટરનું અંતર કાપી જંગલ પાર કરી એક ગામમાં ભણાવવા જાય છે. ગામ સુધી પહોંચવા માટે તેમને 10 કિલોમીટર પગપાળા ચાલવું પડે છે. ધારવાડ તાલુકાના ધોપેનહટ્ટી ગામની સરકારી સ્કૂલમાં તેઓ ભણાવે છે. એકલી જંગલ પાર કરીને જવામાં તેમને જાનવરોના હુમલાનો ખતરો કાયમ રહે છે, પરંતુ ગામના બાળકોને ભણાવી તેમનું જીવન સુધારવાનો ઈરાદો તેમને હિંમત આપે છે.

સુમિત્રા 2005થી આ ગામની સરકારી સ્કૂલમાં ભણાવી રહ્યા છે. સુમિત્રાના ઘરથી ગામની સ્કૂલ સુધી કોઈ રોડ નથી. અડધે સુધી તેમને બસ છોડી દે છે અને તે પછી તેમને પગપાળા જવું પડે છે. ગામની વસતી 400ની આસપાસ છે. સુમિત્રા જણાવે છે કે, ‘રસ્તો ઘણો ખરાબ છે અને લપસી જવાય તેવો છે. સાથે જ જંગલી જાનવરોનો ખતરો કાયમ ઊભો રહે છે. વરસાદના દિવસોમાં સ્થિતિ વધુ ખરાબ થઈ જાય છે, કેમકે મારે પાણી અને કિચડમાંથી પસાર થવું પડે છે.’

સુમિત્રાનું કહેવું છે કે, ‘ગામના મોટાભાગના પરિવારના લોકો મજૂરી કરે છે. હું તેમનું ભવિષ્ય સુધારવા માંગું છું.’ તેમણે જણાવ્યું કે, કેટલાક દિવસો પહેલા સ્કૂલ જતા રસ્તામાં તેમને દીપડો દેખાયો હતો. તે જણાવે છે કે, જ્યારે પણ કોઈ જાનવર દેખાય છે, ત્યારે તે છૂપાઈ જાય છે.’