સુનિતા રાવ, બેંગલુરુઃ સરકારી વાણીવિલાસ હોસ્પિટલમાં તાજેતરમાં 5.9 કિલો વજન ધરાવતા એક બાળકનો જન્મ થયો છે. આ બાળકે લોકોમાં કૌતુક સર્જ્યું છે અને તેને જોવા માટે લોકોની ભીડ જમા થઈ રહી છે. આ બાળકનો જન્મ 18 જાન્યુઆરીએ સવારે થયો હતો. રેકોર્ડ મુજબ તે અત્યાર સુધી હોસ્પિટલમાં જન્મેલા તમામ બાળકોમાંથી સૌથી વધુ વજન ધરાવતું બાળક છે. સિઝેરિયન ઓપરેશનથી આ બાળકનો જન્મ કરાવાયો હતો અને તેને જન્મજાત કોઈ ખોડખાંપણ હોવાનું જાણવા મળ્યું નથી.હવે ટેલિગ્રામ પર મેળવો દરેક મહત્વના સમાચાર, શરૂ કરવા અહીં ક્લિક કરોબાળકના માતા-પિતા યોગેશ અને સરસ્વતી મૂળ દાર્જિલિંગના રહેવાસી છે. તેઓ છેલ્લા 16 વર્ષથી બેંગલુરુમાં રહે છે. આ કપલને બીજું પણ એક બાળક છે. માતા 17 જાન્યુઆરીએ હોસ્પિટલ પહોંચી હતી. ડોક્ટરોને થયું કે આ હાઈ રિસ્ક ડિલિવરી કેસ છે. આથી તેમણે સર્જરી કરી બાળકનો જન્મ કરાવ્યો હતો.પહેલા ડોક્ટરોને મહિલાનું ફૂલેલુ પેટ જોઈને લાગ્યું કે કદાચ તેના ગર્ભમાં જોડિયા બાળકો છે. મહિલાનું વજન ત્યારે 80 કિલો હતું. જ્યારે બાળકનો જન્મ થયો ત્યારે ડોક્ટરોની પણ આંખો પહોળી થઈ ગઈ હતી. વજનકાંટા પર બાળકનું વજન 5.9 કિલો હોવાનું દર્શાવાતું હતું. આ બાળક 56 સે.મી લાંબુ છે. માતાએ પ્રેગનેન્સીના 40 અઠવાડિયા પૂરા કર્યા હતા અને પહેલા બાળકના આગમન પછી 14મા વર્ષે બીજા બાળકને જન્મ આપ્યો હતો.રેકોર્ડ્સ અનુસાર વાણીવિલાસ હોસ્પિટલમાં આટલું વજનદાર બાળક અગાઉ ક્યારે પણ નથી જન્મ્યું. હોસ્પિટલના મેડિકલ સુપ્રીન્ટેન્ડન્ટ ડો. ગીતા શિવમૂર્તિએ જણાવ્યું, “અમે અત્યાર સુધી નવજાતનું સૌથી વધુ વજન 4.2 કિલો હોવાનું જોયું છે. બાળક અને માતા સ્વસ્થ છે. અમારે બાળકના હોર્મોનલ અસેસમેન્ટ ટેસ્ટ કરવાના બાકી છે.”એવી માન્યતા છે કે સામાન્ય રીતે ગર્ભાવસ્થા દરમિયાન માતાને ડાયાબિટીસ આવે તો બાળકનું વજન વધવાની શક્યતા રહે છે. પરંતુ આ કેસમાં તો માતાને પ્રેગનેન્સીમાં ડાયાબિટીસની કોઈ સમસ્યા નહતી. જો કે બાળકનું છેલ્લા બે દિવસમાં 100 ગ્રામ વજન ઓછુ થઈ ગયુ છે જે બધા નવજાત બાળકો માટે સામાન્ય વાત છે. ડોક્ટરો પણ આટલું વધારે વજન ધરાવતા બાળકને જોઈને દંગ રહી ગયા છે.
સરકારી હોસ્પિટલમાં જન્મ્યું 5.9 કિલોનું બાળક, જોવા માટે લોકોના ટોળા ઉમટ્યા
TNN 24 Jan 2020, 12:35 pm