'PSIએ દાઢી હટાવવાના બદલે પોલીસની નોકરી જ છોડી દેવાની હતી'

મેરઠઃ પોતાની દાઢીના કારણે મુસ્લિમ સબ-ઈન્સપેક્ટરને નોકરીમાંથી સસ્પેન્ડ કરવામાં આવ્યા હતા અને તેમણે દાઢી કઢાવી દીધા બાદ તેને ફરીથી ફરજ પર હાજર થવા દેવામાં આવ્યા હતા. સબ-ઈન્સપેક્ટરના આ નિર્ણય અંગે ઉત્તર પ્રદેશના દેવબંધ શહેરના મૌલવીઓએ કહ્યું છે કે મુસ્લિમ સબ-ઈન્સપેક્ટરે દાઢી કઢાવી દેવાના બદલે નોકરી છોડી દેવાની જરૂર હતી.

46 વર્ષીય ઈન્તેઝાર અલી બાગપત જિલ્લામાં સબ-ઈન્સપેક્ટર છે અને ડિપાર્ટમેન્ટની મંજૂરી વગર દાઢી રાખવા બદલ તેમને ગત સપ્તાહે સસ્પેન્ડ કરી દેવામાં આવ્યા હતા. થોડા દિવસ બાદ અલીએ પોતાની દાઢી કઢાવી દીધી હતી અને આ વિવાદનો અંત લાવી દીધો હતો. ઉત્તર પ્રદેશ પોલીસ મૂછોની જાળવણી માટે ભથ્થુ આપે છે પરંતુ દાઢી રાખવાની મંજૂરી નથી. અલીએ જણાવ્યું હતું કે તેમણે દાઢી રાખવા માટે ગત વર્ષે નવેમ્બરમાં મંજૂરી માંગી હતી પરંતુ બાગપતના એસપી અભિષેક સિંઘે મંજૂરી આપી ન હતી.

બાદમાં આ વિવાદ વકર્યો હતો. સોશિયલ મીડિયા પર આને લઈને ઘણી ચર્ચા થઈ હતી. દેવબંધમાં પણ ચર્ચા થઈ હતી જ્યાં મૌલવી દાઢી કઢાવવાને મંજૂરી આપતા નથી. જામિયા એંગલો-અરેબિક મદ્રેસાના મૌલવી મૌલાના લુત્ફર રહેમાન કાસમીએ જણાવ્યું હતું કે કોઈ મુસ્લિમ દાઢી ન રાખે તે ઘણું ખોટુ કહેવાય. ઈસ્લામમાં દાઢી રાખ્યા બાદ તેને કાઢી નાખવી ઘણું મોટું પાપ માનવામાં આવે છે. અમારું માનવું છે કે સબ-ઈન્સપેક્ટરે તેમની દાઢી કઢાવવાના બદલે નોકરીમાંથી રાજીનામુ આપી દેવું જોઈતું હતું.

જમિયત દાવાતુલ મુસ્લીમીનના મૌલાના કારી ઈશાક ગોરાએ જણાવ્યું હતું કે, નોકરીમાં ધાર્મિક સ્વતંત્રતા આપવી જોઈએ. જ્યાં આવી સ્વતંત્રતા ન હોય ત્યાં જોગવાઈ દ્વારા તેને આપવી જોઈએ. કોઈને તેની ધાર્મિક માન્યતાના કારણે નોકરીમાંથી સસ્પેન્ડ કરવો યોગ્ય નથી.

આ વિવાદ દરમિયાન ઉત્તર પ્રદેશના ડાયરેક્ટર જનરલ ઓફ પોલીસ (ડીજીપી) એચસી અવસ્થીએ રાજ્યના સિનિયર અધિકારીઓને એક પત્ર લખીને જણાવ્યું હતું કે, યુનિફોર્મના નિયમોના ઉલ્લંઘનના રિપોર્ટ્સ આવ્યા છે. શીખોને બાદ કરતા પ્રત્યેક પોલીસકર્મીએ દાઢી કાઢવી ફરજીયાત છે. જો મંજૂરી લેવામાં આવી હોય તો પણ દાઢી નાની અને યોગ્ય હોવી જોઈએ. તેવી જ રીતે મૂછોને મંજૂરી છે પરંતુ તેને પણ યોગ્ય રીતે ટ્રિમ કરેલી હોવી જોઈએ.