યુવકે સહ કર્મચારીને લાઇવ વીડિયો બતાવતા કરી આત્મહત્યા

દાર્જિલિંગઃ કોલકાતામાં રહેતા એક બેંક કર્મચારીએ મંગળવારે સવારે ગળાફાંસો ખાઈ આત્મહત્યા કરી લીધી હતી. આત્મહત્યા કરનારા આ યુવક દાર્જિલિંગમાં પોસ્ટેડ હતો. આત્મહત્યાનું કારણ હજી સુધી જાણી શકાયું નથી. યુવકનું નામ પ્રદીપ્ત પાઇક છે અને તેની ઉંમર 26 વર્ષ હતી. મંગળવારે સવારે તેણે તેની ઓફિસમાં કામ કરતી યુવતીને લાઇવ-વીડિયો ચેટ મોકલી હતી. પ્રદીપ્તના એક મિત્ર દ્વારા જાણકારી મળી હતી કે, આ યુવતી તેની સંબંધી પણ હતી. લાઇવ ચેટ જોતાં જ યુવતી ડરી ગઈ હતી અને ઓફિસમાં જ બૂમો પાડવા લાગી હતી. ત્યાર બાદ લોકો પ્રદીપ્તના ઘર તરફ દોડ્યા હતા, પરંતુ ત્યાં સુધીમાં તેણે આત્મહત્યા કરી લીધી હતી.

પ્રદીપ્તનું ઘર તેની ઓફિસથી માત્ર 15 મિનિટના અંતરે છે. તે એક ભાડાના એપાર્ટમેન્ટમાં રહેતો હતો. સૂત્રોના જણાવ્યાનુસાર, પ્રદીપ્ત સાથે સંકળાયેલા લોકોને તેના આ પગલાની આશા નહોતી. આત્મહત્યાના બે કલાક પહેલા પ્રદીપ્તે તેના એક સંબંધીને ફોન કરીને દાળની રેસિપી વિશે પણ પૂછ્યું હતું. ઘટનાના એક દિવસ પહેલાં તેણે ઓફિસમાંથી રજા લીધી હતી.