લગ્ન માટે દબાણ કરાતા ઘર છોડીને જતી રહેલી યુવતી બની ક્લાસ-1 ઓફિસર

ઈશિતા ભાટિયા, મેરઠઃ 'કૌન કહેતા હૈ આસમાન મેં સુરાખ નહીં હોતા, એક પથ્થર તો તબિયત સે ઉછાલો યારોં' આ પંક્તિ સાર્થક કરી બતાવી છે યુપીના મેરઠની રહેવાસી સંજૂ રાની વર્માએ. સંજૂ રાની વર્માએ સાત વર્ષ પહેલા જ્યારે ઘર છોડ્યું હતું તો તેને ખબર નહોતી કે તેને કયા કયા પ્રકારની મુસીબતોનો સામનો કરવો પડશે. જોકે, હાં તેને એ ખ્યાલ હતો કે જો તે ઘરમાં જ રહી તો તેની મુશ્કેલી વધી જશે. વર્ષ 2013માં જ્યારે તેમની માતાનું અવસાન થયું ત્યારે તેની ઉંમર 28 વર્ષની હતી. પરિવારે તેને કહ્યું કે કોલેજમાં અભ્યાસ છોડીને લગ્ન કરી લે.

એક બાજુ લગ્નનું દબાણ બીજી બાજું સપનું
સંજુ મેરઠની આરજી ડિગ્રી કોલેજમાંથી ગ્રેજ્યુએશન પૂરું કરી ચૂકી હતી અને દિલ્હી યુનિવર્સિટીમાંથી પીજી કરી રહી હતી. જેમ જેમ લગ્ન કરવાનું દબાણ વધ્યું તેમ તેમ તેની મુશ્કેલીમાં પણ વધારો થતો ગયો. તેના સપના અને પારિવારિક જીવનની વચ્ચે પસંદગી કરવાની હતી. હવે આ વાત પસાર થયાને સાત વર્ષ વીતી ગયા છે. સંજુને તે વાતનો જરાપણ અફસોસ નથી કે તેણે પોતાનું સપનું સાકાર કરવાનું પસંદ કર્યું.

નોકરી સાથે તૈયારી પણ
ગત અઠવાડિયે જ જાહેર થયેલી યુપી પીસીએસ પરીક્ષા (2018)માં સફળતા મેળવનાર ઉમેદવારોના લિસ્ટમાં તેમનું નામ હતું. સંજુ કહે છે કે, 'તે વર્ષ (2013)માં મારે મારું ઘર તો છોડવું જ પડ્યું પરંતુ ડીયું મા મારો પીજી કોર્સ પણ છોડવો પડ્યો હતો. મેં એક રુમ ભાડે લીધો અને બાળકોને ભણાવવાનું શરૂ કર્યું. મેં પ્રાઈવેટ સ્કૂલોમાં પાર્ટ ટાઇમ શિક્ષક તરીકે પણ ભણાવ્યું. પરંતુ સાથે સાથે જ હું સિવિલ સર્વિસ પરીક્ષાઓની તૈયારી પણ કરતી હતી.

IAS બનવાનું છે સપનું
ટૂંક સમયમાં જ સંજુ કમર્શિયલ ટેક્સ ઓફિસરનું પદ સંભાળશે. પરંતુ હજું આટલી સફળતા મેળવીને જ સંજૂ રાની અટકી જાય તેવી નથી. હજુ તેની આંખમાં સપના અંજાયેલા છે અને તેને પૂરા કરવા માટે તે હજી ખૂબ જ આગળ વધવા ઈચ્છે છે. તે કહે છે કે, 'મને આશા હતી કે મને એસડીએમની પોસ્ટ મળશે. મારું અંતિમ લક્ષ્ય સિવિલ સર્વિસીસ પરીક્ષાઓમાં સફળ થવાનું છે. હું કલેક્ટર બનવા માંગું છું.'