ભાજપના ધારાસભ્યનો 'તમંચા ડાન્સ', બોલિવુડના સોંગ પર લગાવતા હતા ઠુમકા

નવી દિલ્હીઃ નેતા બન્યા બાદ લોકો વ્યક્તિ પાસેથી સારા આચરણની અપેક્ષા કરતા હોય છે. જોકે થોડા થોડા સમયે સમાચારોમાં નેતાજીઓની કરતૂત સામે આવતી રહે છે. ખુદ વડાપ્રધાન મોદી પણ અનેકવાર પ્રજાના આ પ્રતિનિધિઓને પોતાના ચરિત્ર અને વ્યવહાર દ્વારા લોકો વચ્ચે એક આદર્શ સ્થાપવા અંગે અપીલ કરી ચૂક્યા છે. પરંતુ બીજા પક્ષના તો છોડો ખુદ વડાપ્રધાન મોદીના પક્ષના નેતાઓ પર પણ તેની અસર થતી હોય તેવું લાગતું નથી. જેનો પુરાવો આ વીડિયો છે. વીડિયોમાં સ્પષ્ટ જોઈ શકાય છે કે ઉત્તરાખંડમાં ખાનપુરથી ભાજપના ધારાસભ્ય પ્રણવસિંહ ચેમ્પિયન હાથમાં જામ અને હથિયારો પકડીને બોલિવુડના ગીત પર ઠુમકા મારતા જોવા મળી રહ્યા છે. આ વીડિયોમાં ચેમ્પિયનને અભદ્ર ભાષાનો ઉપયોગ કરતા પણ સાંભળી શકાય છે.હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરોલગભગ બે મિનિટના આ વીડિયો માં પ્રણવ રિવોલ્વર અને મોટા હથિયાર સાથે જોઈ શકાય છે. જણાવી દઈએ કે કેટલાક સમય પહેલા પત્રકારને ધમકાવવા મામલે તેમને પાર્ટીમાંથી સસ્પેન્ડ કરવામાં આવ્યા હતા. આ પહેલા પણ પોતાના આવા જ વિવાદાસ્પદ કારનામા માટે ચર્ચામાં રહ્યા છે. આ વીડિયોમાં ધારાસભ્ય ઉપરાંત બીજા પણ કેટલાક લોકો છે. જેઓ તેમની સાથે ડાન્સ કરી રહ્યા છે.વીડિયો વાયરલ થયા બાદ પોલીસનું કહેવું છે કે તેઓ આ મામલે તપાસ કરશે અને વીડિયોમાં જે હથિયાર ધારાસભ્ય પાસે જોવા મળી રહ્યા છે તેના માટેનું લાઈસન્સ તેમની પાસે છે કે નહીં. જોકે આ વીડિયો ક્યારનો છે તે અંગે હજુ કોઈ સ્પષ્ટ જાણવા મળ્યું નથી. તેમજ પ્રણવ આ પ્રાઈવેટ પાર્ટી પોતાના કોઈ વ્યક્તિગત સમારંભમાં કે પછી કોઈ સાર્વજનિક જગ્યાએ કરી રહ્યા છે તે અંગે પણ માહિતી સામે નથી આવી. જોકે હવે એ જોવાનું રહે છે કે ભાજપ પોતાના આ ધારાસભ્યનો વધુ એક વિવાદાસ્પદ વીડિયો જોઈને તેમની વિરુદ્ધ શું પગલા લે છે.