બંગાળમાં દીદીનો ભાજપ પર વળતો પ્રહાર, પક્ષના સાંસદના પત્ની TMCમાં જોડાયાં

કોલકાતાઃ પશ્ચિમ બંગાળની રાજનીતિમાં ઘણા બધા ફેરફાર જોવા મળી રહ્યા છે. સત્તાપક્ષ તૃણમૂલ કોંગ્રેસમાં તોડફોડ બાદ હવે મમતા બેનર્જીએ વળતો પ્રહાર કરતા બીજેપીના ઘરમાં પણ 'સર્જીકલ સ્ટ્રાઈક' કરી છે. બીજેપીના સાંસદ સૌમિત્ર ખાનની પત્ની સુજાતા મંડલ ખાન સોમવારે ટીએમસીમાં સામેલ થઈ ગઈ.

સૌમિત્ર, પશ્ચિમ બંગાળની બિશુનપુર લોકસભા સીટથી ભાજપની ટિકિટ પર સાંસદ છે. તેમણે પત્નીના ટીએમસીમાં સામેલ થવા પર અણગમો વ્યક્ત કરતા કહ્યું, 'મારી સાથે વાતચીત કર્યા વિના જ પત્નીએ આ નિર્ણય લઈ લીધો છે.' જ્યારે સુજાતાએ કહ્યું કે, ઘરના મામલાઓ ઘરમાં જ રહેવા જોઈએ. આ દરમિયાન ટીએમસી સાંસદ સૌગત રોય અને પ્રવક્તા કુણાલ ઘોણ તેમની સાથે ઉપસ્થિત રહ્યા.

કોલકાતામાં ટીએમસીમાં સદસ્યતા લેતા સુજાતાએ કહ્યું કે, મને ભાજપમાં ક્યારેય સન્માન નથી મળ્યું. જો વાત લોકપ્રિયતાની આવે, તો મમતા બેનર્જીનો કોઈ મુકાબલો નથી. પશ્ચિમ બંગાળમાં ભાજપના અધ્યક્ષ દિલીપ ઘોષ અને સૌમિત્ર ખાન વચ્ચે થોડા દિવસો પહેલા જ અણબનાવ થયો હતો.

સોમવારે સવારે જ ચૂંટણી રણનીતિકાર અને પશ્ચિમ બંગાળમાં ટીએમસીના સહયોગીના રૂપમાં જોડાયેા પ્રશાંત કિશોરે ટ્વીટ કરીને કહ્યું, મીડિયાએ ભાજપને લઈને જરૂરિયાતથી વધારે જ પ્રચાર અને પ્રસાર કર્યો છે. પરંતુ વાસ્તવિકતા એ છે કે પશ્ચિમ બંગાળમાં ભાજપને ડબલ અંકમાં સીટ મેળવવા માટે પણ સંઘર્ષ કરવો પડશે.

ઉલ્લેખનીય છે કે ભાજપે પશ્ચિમ બંગાળમાં મમતા બેનર્જીનો મોટો ઝટકો આપ્યો. ગૃહમંત્રી અમિત શાહની ઉપસ્થિતિમાં મમતા બેનર્જીના નિકટ રહેલા મંત્રી સુવેંદુ અધિકારી ભાજપ પક્ષમાં જોડાઈ ગયા તે પોતાની આગેવાનીમાં 10 ધારાસભ્યો અને એક સાંસદને પણ લાવ્યા, જેમાંથી 8 TMCના છે.