બાંગ્લાદેશ: ઢાકામાં ભયાનક વિસ્ફોટ, અત્યાર સુધીમાં 14ના મોત, 100થી વધુ ઈજાગ્રસ્ત

ઢાકા: બાંગ્લાદેશની રાજધાની ઢાકાથી બોમ્બ બ્લાસ્ટના સમાચાર આવી રહ્યા છે. સ્થાનિક મીડિયાના અહેવાલો અનુસાર, ઢાકામાં એક ઈમારતમાં થયેલા વિસ્ફોટમાં ઓછામાં ઓછા 14 લોકો માર્યા ગયા છે અને 100 જેટલા ઘાયલ થયા છે. અધિકારીઓના જણાવ્યા અનુસાર બ્લાસ્ટનું કારણ હજુ સુધી જાણી શકાયું નથી. તેમણે કહ્યું કે ઘટનાસ્થળે બચાવ કામગીરી ચાલી રહી છે અને મૃત્યઆંક વધી શકે છે.

અહેવાલો અનુસાર, બ્લાસ્ટ ઢાકાના ગુલિસ્તાન વિસ્તારમાં થયો હતો. આ ઘટના મંગળવારે સાંજે 4 વાગ્યાની આસપાસ બની હતી. જણાવવામાં આવી રહ્યું છે કે ફાયર સર્વિસની 11 ઈમરજન્સી યુનિટ ઘટનાસ્થળે પહોંચી ગઈ છે અને બચાવ કાર્ય ચાલી રહ્યું છે. ઘાયલોને ઢાકા મેડિકલ કોલેજ હોસ્પિટલમાં લઈ જવામાં આવ્યા છે. આ કોમર્શિયલ બિલ્ડિંગ વ્યસ્ત સિદ્દીકી માર્કેટમાં આવેલી હતી જેમાં ઘણી ઓફિસો અને સ્ટોર્સ હતા. વિસ્ફોટ કથિત રીતે સાત માળની ઈમારતના ગ્રાઉન્ડ ફ્લોર પર સ્વચ્છતા સામગ્રી વેચતા સ્ટોરમાં થયો હતો.