અર્ણબને હાઈકોર્ટમાંથી કોઈ રાહત ના મળી, હવે શુક્રવારે જામીન અરજી પર થશે સુનાવણી

મુંબઈઃ રિપબ્લિક ટીવીના ચિફ એડિટર અર્ણબ ગોસ્વામીને હજી રાહત મળી નથી. અર્ણબ ગોસ્વામીને હાઈકોર્ટમાંથી કોઈ રાહત મળી નથી અને જામીન અરજી પર હવે શુક્રવારે સુનાવણી થશે. અર્ણબ ગોસ્વામીની મુંબઈની ઓફિસનું ઈન્ટિરિયર ડિઝાઈન કરનારા આર્કિટેક્ટ અન્વય નાયકએ 2018મા કરેલી આત્મહત્યાના કેસમાં અર્ણબ ગોસ્વામી ધરપકડ કરવામાં આવી છે. જોકે, બોમ્બે હાઈકોર્ટે ગુરૂવારે તેમની જામીન અરજી ફગાવી દીધી હતી.

તેમના કાઉન્સેલ આબાદ પોન્ડાએ હાઈકોર્ટને ન્યાય આપવા માટે વિનંતી કરી હતી. જોકે, હાઈકોર્ટે સ્પષ્ટ કહ્યું હતું કે તે તમામ પક્ષોને સાંભળશે અને ત્યારબાદ જ નિર્ણય લેશે. ગોસ્વામીએ બુધવારે હેબિયસ કોર્પ્સ અરજી દાખલ કરી હતી. હાઈકોર્ટમાં પોન્ડાએ જણાવ્યું હતું કે, હું હાઈકોર્ટને અપીલ કરું છું કે તેઓ જામીન મંજૂર કરે. પોન્ડા અને હરિશ સાલ્વે ગોસ્વામીનો કેસ લડી રહ્યા છે અને તેમણે ગોસ્વામીની ધરપકડને ગેરકાયદેસર ગણાવી હતી.

પોન્ડાએ જણાવ્યું હતું કે સુનાવણીમાં ઝડપ દાખવવામાં આવે કેમ કે શુક્રવાર દિવાળી વેકેશન પહેલાનો અંતિમ વર્કિંગ દિવસ છે. પરંતુ જસ્ટિસ એસએસ શિન્દે અને જસ્ટિસ એમએસ કાર્ણિકની હાઈકોર્ટની બેન્ચે જણાવ્યું હતું કે આ મામલામાં તમામ પક્ષોને સાંભળ્યા વગર નિર્ણય આપી શકાય નહીં. તેવામાં સરકાર અને ફરિયાદકર્તા સહિત તમામ પક્ષોને જવાબ રજૂ કરવા માટે શુક્રવારે બપોરે 3 વાગ્યા સુધીનો સમય આપવામાં આવ્યો છે.

શું છે સમગ્ર ઘટના?
અર્ણબની ધરપકડનો મામલો 2018નો છે. પોલીસના જણાવ્યા પ્રમાણે રિપબ્લિક ટીવીનો સ્ટૂડિયો તૈયાર કરનારી કંપની કોન્કોર્ડ ડિઝાઈન પ્રાઈવેટ લિમિટેડના એમડી અન્વય નાઈક અને તેમની માતાએ 2018મા આત્મહત્યા કરી હતી. અન્વયે આત્મહત્યા પહેલા એક પત્ર લખ્યો હતો. આ પત્રમાં તેમણે લખ્યું હતું કે રિપબ્લિક ટીવીના 82 લાખ રૂપિયા સહિત અન્ય કંપનીઓ- આઈકાસ્ટએક્સ/સ્કાય મીડિયા અને સ્માર્ટવર્ક્સ પાસે કુલ 5.40 કરોડ રૂપિયા લેવાના છે જેના કારણે તેમની આર્થિક સ્થિતિ દયનીય બની ગઈ છે. તેમની પાસે આત્મહત્યા કરવા સિવાય બીજો કોઈ વિકલ્પ રહ્યો નથી.