બુલંદશહર ગેંગ રેપ કેસમાં અખિલેશ સરકારની કડક કાર્યવાહી, SSP-ASP સહિત આખું પોલીસ સ્ટેશન સસ્પેન્ડ

બુલંદશહરઃ ઉત્તર પ્રદેશના બુલંદશહરમાં શુક્રવારે રાતે બનેલી સામૂહિક બળાત્કારની ઘટના બાદ રવિવારે રાજ્યની અખિલેશ સરકારે કડક કાર્યવાહી કરી એસએસપી, એએસપી, સીઓ તથા બે ઇન્સ્પેક્ટર સહિત આખા પોલીસ સ્ટેશનને સસ્પેન્ડ કરી દીધું હતું. એસએસપી બુલંદશહર વૈભવ કૃષ્ણ, એસપી સિટી રામમોહન સિંહ, સીઓ હિમાંશુ ગૌરવ અને બે ઇન્સ્પેક્ટરને સસ્પેન્ડ કરવામાં આવ્યા છે.

આ પહેલાં શુક્રવારે ઉત્તર પ્રદેશ પોલીસે ત્રણ લોકોની ધરપકડ કરી હતી. સૂત્રોના જણાવ્યાનુસાર, ત્રણ આરોપીઓ બાવરિયા જૂથના છે. ધરપકડ કરાયેલા ત્રણેય આરોપીઓમાં બબલુ બાવરિયા, રઇસનો સમાવેશ થાય છે. જ્યારે ત્રીજા આરોપીની ઓળખ થઈ શકી નથી. ઉત્તર પ્રદેશ પોલીસ વડા જાવીદ અહમદે રવિવારે પ્રેસ કોન્ફરન્સ કરી તપાસ વિશે જણાવ્યું હતું. જાવીદ અહમદે કહ્યું હતું કે, પીડિતાએ ત્રણ આરોપીની ઓળખ કરી છે. જોકે પોલીસ વડાએ ત્રણેય આરોપીઓની ઓળખ જાહેર કરી નથી.

સામૂહિક બળાત્કારની આ ઘટનાને રાજ્યના મુખ્યપ્રધાન અખિલેશ યાદવે ગંભીરતાથી લઈને પોલીસને આ મામલે ખુલાસો કરવા 24 કલાકનો સમય આપ્યો છે. અખિલેશ યાદવે કહ્યું છે કે, દોષીતોની જલદી ધરપકડ કરી ઝડપી કાર્યવાહી કરી એવી સજા આપવામાં આવશે, જેથી ભવિષ્યમાં કોઈ આવું કૃત્યુ કરવાનું નહિ વિચારે. બુલંદશહરની આ ઘટના બાદ ઉત્તર પ્રદેશની સમાજવાદી પાર્ટી (એસપી) સરકાર પર વિરોધ પક્ષોએ પ્રહારો શરૂ કરી દીધા છે. બહુજન સમાજ પાર્ટી (બસપા)નાં સુપ્રીમો માયાવતીએ કહ્યું છે કે, રાજ્યમાં કાયદો-વ્યવસ્થાની સ્થિતિ કથળી ગઈ છે. આ પ્રકારની ઘટનાઓ દર્શાવે છે કે, એસપી સરકારને લોકોના જીવ અને સન્માનની જરાય ચિંતા નથી.