ચાલતી બસમાં ડ્રાઈવરને આવ્યો હાર્ટ એટેક, મોત પહેલા બચાવ્યા 28 લોકોના જીવ

સિમલાઃ હિમાચલ પ્રદેશમાં એક બસ ડ્રાઈવરને ચાલતી બસમાં હાર્ટ એટેક આવ્યો હતો. જેના કારણે તેમનું મોત થયું પરંતુ જીવ ગુમાવતા પહેલા તેમણે બસમાં સવાર 28 લોકોના જીવ બચાવ્યા હતા. હિમાચલ પ્રદેશના રહેવાસી 47 વર્ષીય અશોક થાપાએ પોતાની સૂઝ-બૂઝથી 28 લોકોના જીવ બચાવી લીધા હતા.

થાપાએ એક ખાનગી બસ ચલાવી રહ્યા હતા ત્યારે તેમને હાર્ટ એટેક આવ્યો હતો. હાર્ટ એટેક આવ્યો ત્યારે બસ ખીણમાં ન પડે તે માટે તેમણે બસને બીજી તરફ વાળી લીધી હતી. જોકે, થાપાનો જીવ બચી શક્યો ન હતો પરંતુ તેમણે પોતાનો જીવ ગુમાવ્યો તે પહેલા અન્ય લોકોનો જીવ બચાવી લીધો હતો.

આ ઘટના સિરમૌર જિલ્લાની છે. એક ખાનગી બસ સાલહિબ-શિલાઈ એનએચ પર રેણુકાજી સતૌનથી પાવંટા તરફ જઈ રહી હતી. આ દરમિયાન રાજબન ખાણ ચેક પોસ્ટ પાસે ડ્રાઈવર અશોક થાપાને હાર્ટ એટેક આવ્યો હતો. ડ્રાઈવરની આંખો બંધ થવા લાગી હતી અને તેમની છાતીમાં ભયંકર દુખાવો થઈ રહ્યો હતો.

બસને ખીણમાં પડતી અટકાવવા માટે ડ્રાઈવર પાસે થોડી જ સેકન્ડો બચી હતી. આ દરમિયાન થાપાએ બસ ખીણમાં જવા દીધી ન હતી અને બસને બીજી તરફ વાળી દીધી હતી. બસ એક થાંભલાને તોડતા પથ્થરો વચ્ચે જઈને ઊભી રહી ગઈ હતી.

મુસાફરોએ ડ્રાઈવરને તાત્કાલિક ગંભીર અવસ્થામાં પાવંટા હોસ્પિટલ પહોંચાડ્યા હતા જ્યાં તેમનું મોત થયું હતું. પાવંટા હોસ્પિટલના ડોક્ટર અંકુરે જણાવ્યું હતું કે હોસ્પિટલ પહોંચતા પહેલા જ ડ્રાઈવરનું મોત થયું હતું.