બ્યુરોક્રેટ બંસલે સ્યુસાઇડ નોટમાં લખ્યું, CBIએ મને અને મારા પરિવારને ટોર્ચર કર્યો

રાજા શેખર, નવી દિલ્હીઃ કોર્પોરેટ અફેયર્સ મિનિસ્ટ્રીમાં એક્સ ડિરેક્ટર જનરલ બી. કે. બંસલ અને તેમના પુત્રે મંગળવારે આત્મહત્યા કરી હતી. બંસલની સ્યુસાઇડ નોટમાં સીબીઆઈ અધિકારીઓ પર ટોર્ચર કરવાનો આરોપ લગાવાયો છે. બંસલ મિનિસ્ટ્રી ઓફ કોર્પોરેટ અફેયર્સમાં એડિશનલ સેક્રેટરી રેન્કના ઓફિસર હતા. સીબીઆઈએ ગત 16 જુલાઈએ તેમની ધરપકડ કરી હતી. તેમની પર એક ફાર્મા કંપની પાસેથી લાંચ લેવાનો આરોપ હતો.

સીબીઆઈએ કહ્યું છે કે, જો તપાસ દરમિયાન નિયમોનું ઉલ્લંઘન થયું હોવાનું બહાર આવશે તો સંબંધિત સીબીઆઈ અધિકારીઓ સામે સખત કાર્યવાહી કરવામાં આવશે. બંસલ અને તેમના પુત્રની સ્યુસાઇડ નોટમાં ચોંકાવનારી વિગતો બહાર આવી છે. સાત પાનાંની સ્યુસાઇડ નોટમાં 18 અને 19 સપ્ટેમ્બરની રાતે મહિલા સીબીઆઈ અધિકારીઓએ કથિત રીતે બંસલનાં પત્નીને માર્યા હોવાનું જણાવાયું છે. બંસલે નોટમાં લખ્યું છે કે, એક ડીઆઈજી રેન્કના સિનિયર અધિકારીએ તેમની સાથે ગેરવર્તણૂક કરી હતી. આ સાથે તેમના પરિવારને મારી નાખવાની પણ ધમકી આપી હતી.

સ્યુસાઇડ નોટમાં કથિત રીતે એ સીબીઆઈ અધિકારીઓનાં નામ છે, જેમણે કથિત રીતે બંસલના પરિવારનું ઉત્પીડન કર્યું હતું. બંસલે પોતાની સ્યુસાઇડ નોટમાં સીબીઆઈના એક ડીઆઈજી રેન્કના અધિકારી સહિત સંબંધિત તપાસ અધિકારીઓની ભૂમિકાની તપાસ કરવાની માગ કરી છે.

ડેપ્યુટી કમિશનર ઓફ પોલીસ (ઇસ્ટ) ઋષિપાલ સિંહે કહ્યું છે કે, 60 વર્ષના બંસલ અને તેમના 30 વર્ષના પુત્ર યોગેશને ઘરઘાટીએ ફ્લેટમાં ગળે ફાંસો ખાધેલી હાલતમાં જોયા હતા. બંને પાસેથી સ્યુસાઇડ નોટ પણ મળી હતી. થોડા મહિના પહેલાં બંસલનાં પત્ની સત્યબાલા (58) અને પુત્રી નેહા (28)એ પણ આ રીતે આત્મહત્યા કરી લીધી હતી.

Summery: Ex-director of Corporate affairs BK Bansal who allegedly committed suicide along with his son Yogesh. Bansal has accused some CBI officers of torturing him and his family. In Suicide not, Bansal had named four CBI officials.