18 વર્ષથી ઉપરના તમામ નાગરિકોને મફત વેક્સીન આપશે સરકારઃ વડાપ્રધાન મોદી

વડાપ્રધાન નરેન્દ્ર મોદીએ સોમવારે દેશને સંબોધિત કર્યો હતો. જેમાં તેમણે દેશમાં કોરોનાની વર્તમાન પરિસ્થિતિ તથા વેક્સીનને લઈને વાત કરી હતી. હાલમાં દેશમાં કોરોનાના કેસમાં સતત ઘટાડો થઈ રહ્યો છે. તેમણે કહ્યું હતું કે 21 જૂનથી દેશના 18 વર્ષથી ઉપરના તમામ નાગરિકોને મફતમાં વેક્સીન આપવામાં આવશે. વડાપ્રધાને પોતાના સંબોધનમાં કરેલી મહત્વની વાતો...

- ભારત કોરોનાની બીજી લહેરનું સાક્ષી બન્યું છે અને દેશ હાલમાં પણ તેની સામે લડી રહ્યો છે.
- છેલ્લા 100 વર્ષમાં આ સૌથી ભયંકર રોગચાળો રહ્યો છે. આ મોટી ટ્રેજેડી છે. આધુનિક વિશ્વએ આવો રોગચાળો ક્યારેય જોયો નથી અને અનુભવ્યો નથી. આવા વૈશ્વિક રોગચાળા સામે દેશ ઘણા મોરચે એક સાથે મળીને લડ્યો છે.
- બીજી લહેર દરમિયાન એપ્રિલ અને મેમાં ભારતમાં કલ્પના ન કરી હોય તેટલા પ્રમાણમાં મેડિકલ ઓક્સિજનની માંગ વધી હતી. ભારતના ઈતિહાસમાં ક્યારેય આટલા મોટા પ્રમાણમાં ઓક્સિજનની જરૂરીયાત વર્તાઈ નથી.
- આ જરૂરીયાતને પૂરી કરવા માટે યુદ્ધના ધોરણે કામ કરવામાં આવ્યું હતું. તમામ સરકારી મશનિરી કામે લગાડી દેવામાં આવી હતી.

- આજે સમગ્ર વિશ્વમાં વેક્સીનની જરૂરિયાતની તુલના કરવામાં આવે તો જે દેશો વેક્સીન બનાવે છે તે ઘણી ઓછી છે.
- કલ્પના કરો જો આપણી પાસે મેડ ઈન ઈન્ડિયા વેક્સીન ન હોત તો આપણા જેવા વિશાળ દેશની હાલત આજે શું હોત?
- જો આપણે છેલ્લા 50-60 વર્ષ પહેલાના ભારતને જોઈએ તો વિદેશમાં તૈયાર થતી વેક્સીન મેળવવામાં આપણને દાયકાઓ લાગી જતા હતા. વિદેશમાં રસીકરણ પૂરૂ થઈ ગયા બાદ પણ આપણે દેશમાં રસીકરણની શરૂઆત કરી શકતા ન હતા.
- ભારતે એક જ વર્ષમાં બે મેડ ઈન ઈન્ડિયા વેક્સીન તૈયાર કરી છે. આપણા વૈજ્ઞાનિકોએ દેખાડી દીધું કે ભારત શક્તિશાળી દેશો કરતા પાછળ નથી. ભારતમાં 23 કરોડથી વધારે ડોઝ આપવામાં આવ્યા છે.

- દેશે કરેલા સતત પ્રયાસો અને આકરી મહેનતના કારણે આગામી દિવસોમાં વેક્સીનનો સપ્લાય વધશે.
- આજે દેશમાં સાત કંપનીઓ વિવિધ વેક્સીન બનાવી રહી છે. આ ઉપરાંત વધુ ત્રણ વેક્સીનની ટ્રાયલ એડવાન્સ સ્ટેજમાં છે.
- હવેથી રાજ્ય સરકારોએ વેક્સીન માટે એક પણ રૂપિયાનો ખર્ચ કરવો પડશે નહીં. અત્યાર સુધી દેશના કરોડો લોકોને મફતમાં વેક્સીન મળી છે. હેવ દેશના 18 વર્ષથી ઉપરના તમામ લોકોને પણ મફતમાં વેક્સીન મળશે.
- 21 જૂનથી કેન્દ્ર સરકાર 18 વર્ષથી ઉપરના તમામ લોકોને મફતમાં વેક્સીન આપશે.