ચારધામ યાત્રાઃ પૂજા અર્ચના બાદ ખૂલ્યા કેદારનાથ ધામના કપાટ, હજારો શ્રદ્ધાળુઓ ઉમટ્યા

ઉત્તરાખંડના કેદારનાથ ધામના કપાટ મંગળવારની સવારે 6.20 વાગે ખોલવામાં આવ્યા હતા. મંદિરના મુખ્ય પૂજારી જગદગુરુ રાવલ ભીમ શંકર લિંગ શિવાચાર્યએ મંદિરના કપાટ ખોલ્યા હતા. આ દરમિયાન પરંપરાગત વાદ્યો પણ વગાડવામાં આવ્યા હતા. આ દરમિયાન વૈદિક મંત્રોચ્ચારથી કેદારનાથ ધામ ગૂંજી ઉઠ્યું હતું. ભક્તોએ જય કેદાર, હર હર શંભો અને બમ બમ ભોલેના નાદ લગાવ્યા હતા અને કેદારનાથ ધામમાં ભક્તિનો માહોલ સર્જાયો હતો.

બાબા કેદારનાથ ધામને લગભગ 20 ક્વિન્ટલ ફૂલોથી સજાવવામાં આવ્યું હતું. કેદારનાથ ધામમાં છેલ્લાં 72 કલાકોથી ભારે હિમવર્ષા થઈ રહી છે. ખરાબ હવામાનના કારણે મંદિરે જઈ રહેલાં હજારો ભક્તોને આગળ વધવાથી રોકવામાં આવ્યા હતા. એ પછી લગભગ 8 હજાર જેટલાં શ્રદ્ધાળુઓ બાબા કેદારનાથ ધામ પહોંચ્યા હતા.

કેદારનાથ ધામની પૌરાણિક પરંપરાગત હેઠળ મંગળવારે સવારે 6.20 વાગે મંદિરના કપાટ ખોલવામાં આવ્યા હતા. ખરાબ હવામાનના કારણે સીએમ પુષ્કર સિંહ ધામી આ સમયે હાજર રહી શક્યા નહોતા. આ પહેલાં કેદારબાબાની પંચમુખી મૂર્તિને શ્રૃંગાર પણ કરવામાં આવ્યો હતો. તેમને ભોગ પણ ધરાવવામાં આવ્યો હતો અને વિધિવત રીતે પૂજા અર્ચના કરવામાં આવી હતી.

કેદારનાથ ધામમાં સતત ભારે હિમવર્ષા થઈ રહી છે. જેના કારણે ઠંડીનો પારો માઈનસ 6 ડિગ્રી સેલ્સિયસ સુધી પહોંચી ગયો છે. કડકડતી ઠંડી હોવા છતા પણ કેદારનાથ ધામમાં શ્રદ્ધાળુઓની ભારે ભીડ જોવા મળી હતી.

કેદારનાથ ધામમાં સવારે પાંચ વાગે જ કપાટ ખોલવા માટેની પ્રક્રિયા શરુ કરવામાં આવી હતી. ધાર્મિક પંરપરાઓની સાથે બાબા કેદારનાથની પંચમુખી ભોગ મૂર્તિ ડોલીમાં રાવલ નિવાસથી મંદિર પરિસરમાં પહોંચી હતી. અહી ભક્તોએ બાબાનો જયકાર કર્યો હતો.

બાબા કેદારનાથનો ધામ રોશનીથી શણગારવામાં આવ્યું હતું. સોમવારની સાંજથી જ બાબાના ધામમાં ભવ્ય નજારો જોવા મળ્યો હતો. અહીં પહોંચેલા ભક્તો મંદિરના કપાટ ખોલવાની રાહ જોઈ રહ્યા હતા.

કેદારનાથ ધામમાં ભારે હિમવર્ષા વચ્ચે કપાટ ખોલવામાં આવ્યા હતા. મોટી સંખ્યામાં શ્રદ્ધાળુઓ પહોંચ્યા હતા. આ દરમિયાન બાબા કેદારનાથ ધામનો ભવ્ય નજારો જોવા મળ્યો હતો.