ભારતને આંકવામાં થાપ ખાઈ ગયા જિનપિંગ, પોતાની જ જાળમાં ફસાઈ ગયું ચીનઃ એક્સપર્ટ

ચેલાણીએ કહ્યું છે કે કોરોના રોગચાળાનો ફાયદો ઉઠાવીને ચીને પોતાની સરહદો વિસ્તારવાનો એજન્ડા ચલાવ્યો હતો. પરંતુ ભારત સહિદ ઘણા દેશોએ તેને પીછેહઠ કરવા મજબૂર કરી દીધું છે. તે દક્ષિણ ચીન સાગરમાં પણ આ પ્રકારનો એજન્ડા ચલાવતું રહ્યું છે. હકીકતમાં બ્રહ્મ ચેલાણી અવારનવાર ચીન અંગે તથ્યો સાથે વિચાર રજૂ કરે છે. ચીની મીડિયાને તેમની આવી સ્પષ્ટ વાતો કડવી લાગે છે અને ત્યાંથી તેમની વાતોને તોડીમરોડીને રજૂ કરવામાં આવે છે. ચેલાણીએ જાતે જણાવ્યું છે કે તેમના આર્ટિકલ બાદ ચીન સરકારના મુખપત્ર ગ્લોબલ ટાઈમ્સ તરત જ જવાબ આપે છે. 2018 બાદ આ તેમનો 10મો એવો આર્ટિકલ છે જેના પર ચીની મીડિયા અકળાયું છે.

ચેલાણીએ કહ્યું છે કે ભારતે હવે ચીન સાથે તુષ્ટીકરણનો વ્યવહાર છોડી દીધો છે જેને જોઈને ચીનની હાલત પણ ખરાબ છે. ગત મહિને જિનપિંગે પોતાની સેના પીએલએને કહી દીધું હતું કે સરહદોની સુરક્ષા વધારે મજબૂત કરવામાં આવે. નોંધનીય છે કે ચીનના સૈનિકોએ ગલવાન ખીણમાં હુમલો કરી દીધો હતો અને બંને દેશના સૈનિકો વચ્ચે અથડામણ થઈ હતી જેમાં તેના ઘણા સૈનિકો માર્યા ગયા હતા. છેલ્લા ચાર દાયકામાં આવું પહેલી વખત થયું છે કે ચીનનો કોઈ સૈનિક યુએન પીસકીપિંગ મિશન ઉપરાંત માર્યો ગયો છે. ચીને હજી પણ તેના માર્યા ગયેલા સૈનિકોનો આંકડો જાહેર કર્યો નથી અને જિનપિંગને વૈશ્વિક સમુદાય સામે શરમજનક સ્થિતિમાં મૂકાવું પડ્યું છે.

ભારતે પેંગોગ લેક વિસ્તારમાં ઓછામાં ઓછી 20 મહત્વની જગ્યાએ પોઝિશન લઈ લીધી છે. ભારતની સ્પેશિયલ ફ્રન્ટિયર ફોર્સ ચીનના નાક નીચે ઓપરેશન ચલાવી રહી છે. ભારતે ચીનને કડક સંદેશ આપ્યો છે કે ભારત અને ચીન વચ્ચે તિબેટમાં ચીન જેટલું મજબૂત પોતાને સમજે છે તેટલું તે છે નહીં. તિબેટના લોકો ચીનને અત્યાચારીથી વધારે કંઈ સમજતા નથી. ચીન ઈચ્છે છે કે જે રીતે તેણે દક્ષિણ ચીન સાગરમાં પોતાનો દબદબો બનાવ્યો છે તેવી જ રીતે તે હિમાલયના વિસ્તારોમાં પણ સફળ થશે પરંતુ ભારતે તેને જણાવી દીધું છે કે આ શક્ય નથી.