ગુજરાત સહિત ચાર રાજ્યોમાં કોરોનાના કેસો વધતા મચી હલચલ, કેન્દ્રએ મોકલી ટીમ

નવી દિલ્હી: દેશમાં બિહારની ચૂંટણી, પેટાચૂંટણીઓ અને દિવાળી પછી કોરોના કેસો વધશે તેવી દહેશત સાચી પડી છે. છેલ્લા કેટલાક દિવસોમાં ગુજરાત, રાજસ્થાન, હરિયાણા અને મણિપુરમાં કોરોના કેસોમાં ઉછાળો આવવાની સાથે-સાથે કોરોનાથી મોતના આંકડા પણ ચિંતાનજક હદે વધી રહ્યા છે. જેને પગલે કેન્દ્ર સરકારે ઉચ્ચ સ્તરીય કેન્દ્રીય ટીમોને આ ચાર રાજ્યોમાં મોકલી છે.

ગુજરાત આવેલી કેન્દ્રીય ટીમની આગેવાની NCDCના ડિરેક્ટર ડો. એસ એક સિંઘને સોંપવામાં આવી છે. હરિયાણામાં AIIMS દિલ્હીના ડિરેક્ટર ડો. રણદીપ ગુલેરિયાની આગેવાની ટીમ મોકલવામાં આવી છે. જ્યારે આરોગ્ય વિભાગના સભ્ય ડો. વી કે પોલની આગેવાનીમાં એક ટીમ રાજસ્થાન મોકલાઈ છે. મણિપુર ગયેલી ટીમનું નેતૃત્વ ડીએચજીએસના એડિશનલ ડીડીજી ડો. એલ સ્વસ્તિચરણને સોંપાયું છે.

આ ટીમો તેમને જે રાજ્યોની જવાબદારી સોંપાઈ છે તેના રાજ્યોમાં જે જિલ્લામાં કોરોના કેસો વધુ નોંધાયા છે, ત્યાંની મુલાકાત લેશે અને રાજ્યને કન્ટેનમેન્ટ કડક કરવામાં, સર્વેલન્સમાં, ટેસ્ટિંગમાં અને સંક્રમણથી બચાવ તેમજ તેને કાબુમાં લેવાના પગલાં મદદ કરશે. આ ઉપરાંત પોઝિટિવ કેસોના અસરકારક ક્લિનિકલ મેનેજમેન્ટમાં મદદરૂપ બનશે.

આ ટીમ રાજ્યોને સમયસર ડાયગ્નોસિસ અને ફોલોઅપને લગતા પડકારોનો કઈ રીતે સામનો કરવો તે અંગે પણ સૂચનો આપશે.

જે ચાર રાજ્યોમાં કેન્દ્રની ટીમો મોકલવામાં આવી છે ત્યાં અત્યાર સુધી નોંધાયેલા કોરોનાના કેસોની વાત કરીએ તો, ગુજરાતમાં કુલ 1,91,642 કેસ નોંધાયા છે. જ્યારે હરિયાણામાં 2,07,039 કેસ, રાજસ્થાનમાં 2,32,38 કેસ અને મણિપુરમાં 22,318 કેસ નોંધાયા છે. આ રાજ્યોમાં કોરોનાથી થયેલા મોતના આંકડા જોઈએ તો, ગુજરાતમાં કુલ 3,823 દર્દીઓના મોત થયા છે. જ્યારે હરિયાણામાં 2,093, રાજસ્થાનમાં 2,101, મણિપુરમાં 231 દર્દીઓના મોત થયા છે.

આખા દેશની વાત કરીએ તો દેશમાં અત્યાર સુધીમાં 89,58,483 કેસ નોંધાયા છે. જ્યારે મૃત્યુઆંક 1,31,578એ પહોંચી ગયો છે.