કોરોનાની સારવારના બિલમાં માસ્ક અને સેનેટાઈઝરના નામે દર્દી પાસેથી 20 હજાર રૂપિયા વસૂલ્યા

ગુરુગ્રામ, હરિયાણા: કોરોના વાયરસની સારવારના નામે ખાનગી હોસ્પિટલ્સમાં દર્દીઓ પાસેથી વધુ ચાર્જ વસૂલવામાં આવી રહ્યો હોવાના ઘણાં કિસ્સા જોવા મળ્યા છે. ત્યારે હાલમાં હરિયાણાના ગુરુગ્રામની એક ખાનગી હોસ્પિટલનો ચોંકાવનારો કિસ્સા સામે આવ્યો છે. અહીં એક દર્દીએ મેડિકલ બેદરકારી બોર્ડમાં ફરિયાદ નોંધાવી છે કે તેની પાસેથી માસ્ક, સેનેટાઈઝર, કેપ અને ગ્લવ્ઝના નામે રૂપિયા 20 હજાર વસૂલવામાં આવ્યા, જ્યારે આ દર્દીએ માસ્કની માગણી કરી તો તેને 7 દિવસમાં માત્ર 2 વખત માસ્ક આપવામાં આવ્યા. બિલની અન્ય રકમ તેણે ઈન્સ્યોરન્સ પોલિસીમાંથી આપી દીધી પણ આ 20 હજાર રૂપિયા આપવા પડ્યા. હોસ્પિટલે દબાણ કરતા દર્દીએ ઉધાર લઈને આ રકમ ચૂકવી. દર્દીએ કહ્યું કે જે ચીજવસ્તુઓનો મેં ઉપયોગ નથી કર્યો તેના પૈસા શું કામ આપું? આ કેસ ઓવરચાર્જ સાથે જોડાયેલો છે, આ અંગેની પોલીસમાં ફરિયાદ કરવી જોઈએ તેવું એક સિવિલ સર્જનનું કહેવું છે.

ગુરુગ્રામ, હરિયાણાના રહેવાસી શુભમ પટેલે આ વિશે વાત કરતા જણાવ્યું કે મારામાં કોરોનાના લક્ષણ જોવા મળતા મેં કોરોના ટેસ્ટ કરાવ્યો હતો જે પોઝિટિવ આવ્યો હતો. તારીખ 7 સપ્ટેમ્બરના દિવસે કોરોનાના ઈલાજ માટે હું એક ખાનગી હોસ્પિટલમાં દાખલ થયો હતો, જ્યાં 7 દિવસની સારવાર પછી તારીખ 14 સપ્ટેમ્બરના દિવસે મને ડિસ્ચાર્જ કરવામાં આવ્યો. 7 દિવસના ઈલાજનું મને 1,91202 રૂપિયાનું બિલ આપવામાં આવ્યું. મારી પાસે હેલ્થ ઈન્સ્યોરન્સ હતો એટલે ઈન્સ્યોરન્સ કંપનીએ હોસ્પિટલને 1,48,763 રૂપિયાની ચૂકવણી કરી. હોસ્પિટલને જ્યારે મેં આ બિલ વિશે પૂછ્યું ત્યારે તેમણે કોઈ જાણકારી આપી નહીં, અને કહ્યું કે પૈસાની ચૂકવણી પછી જણાવવામાં આવશે કે કઈ દવાના કેટલા રૂપિયા ચાર્જ કર્યા છે.

શુભમે જણાવ્યું કે તેણે દોસ્તો પાસેથી ઉધાર લઈને આ બિલના બાકી રૂપિયાની ચૂકવણી કરી. બિલની કોપી જોયા પછી તે ચોંકી ગયો. બિલમાં માસ્ક, સેનેટાઈઝર, કેપ અને ગ્લવ્ઝના નામે આશરે રૂપિયા 20 હજાર જોડવામાં આવ્યા હતા. જ્યારે દર્દીને 7 દિવસ દરમિયાન માત્ર 2 વખત માસ્ક આપવામાં આવ્યું હતું. દર્દીને જે ચીજવસ્તુઓ મળી નહોતી તેનો ઉલ્લેખ પણ આ બિલમાં હતો. આ વિશેની ત્યાંની સિવિલ સર્જન ઓફિસમાં લેખિતમાં ફરિયાદ કરવામાં આવી. હવે દર્દીને આ વિશે પોલીસ ફરિયાદ કરાવવાનું જણાવવામાં આવ્યું છે, આ મામલે પોલીસ વધુ તપાસ હાથ ધરશે.