કોરોના અંગે કેન્દ્રની નવી ગાઈડલાઈન્સઃ સિનેમા હોલમાં વધશે દર્શકો, સ્વિમિંગ પૂલ પણ ખુલશે

ભારતમાં કોરોના વાયરસના કેસ અને મૃત્યુઆંકમાં સતત ઘટાડો થઈ રહ્યો છે. કેન્દ્ર સરકાર દ્વારા હવે કોરોનાની નવી ગાઈડલાઈન્સ જાહેર કરવામાં આવી છે. જેમાં કેટલીક છૂટછાટ વધારવામાં આવી છે. કેન્દ્રીય ગૃહ મંત્રાલય દ્વારા જાહેર કરવામાં આવેલી નવી ગાઈડલાઈન્સમાં સિનેમા હોલ અને થિયેટર્સને વધારે રાહત મળી છે. આ નવી ગાઈડલાઈન્સ 1 ફેબ્રુઆરીથી અમલમાં આવશે.

સિનેમા હોલ અને થિયેટર્સમાં 50 ટકા બેઠકની મંજૂરી અગાઉ આપવામાં આવી હતી. હવે તેમાં વધારો કરીને બેઠક ક્ષમતામાં વધારવામાં આવી છે. આ ઉપરાંત સ્પોર્ટ્સ અને યુથ અફેર્સ મંત્રાલય દ્વારા એસઓપી જાહેર કર્યા બાદ સ્વિમિંગ પૂલ્સ પણ શરૂ થઈ શકે છે. એક્ઝિબિશન હોલ્સ પણ નવી એસઓપી પ્રમાણે ખૂલી શકે છે. હાલમાં રમતવીરો માટે સ્વિમિંગ પૂલ્સ ખોલવાની મંજૂરી આપવામાં આવી છે. હવે સ્વિમિંગ પૂલ્સ તમામ લોકો માટે ખુલશે.

રાજ્યો અને કેન્દ્ર શાસિત પ્રદેશોએ કોવિડ-19 માટેની તમામ ગાઈડલાઈનનું પાલન કરાવવાનું રહેશે. જેમાં લોકો ફેસ માસ્ક પહેરે, સેનિટાઈઝર્સ અને સોશિયલ ડિસ્ટન્સિંગનું પાલન કરે તે સુનિશ્ચિત કરવાનું રહેશે. આ ઉપરાંત 65 વર્ષથી વધુની વયના લોકો, બીમારી ધરાવતા લોકો, ગર્ભવતી મહિલાઓ અને 10 વર્ષથી નીચેના બાળકો બિનજરૂરી પ્રવૃત્તિઓ માટે પણ ઘરની બહાર જઈ શકશે પરંતુ તેમને સાવચેતી રાખવાની સલાહ આપવામાં આવી છે.

નવી ગાઈડલાઈન્સના મહત્વના મુદ્દા
- સિનેમા હોલ્સ અને થિયેટર્સ જેને હાલમાં 50 ટકા બેઠકની ક્ષમતાની મંજૂરી આપવામાં આવી છે. તેમાં હવે બેઠક ક્ષમતાનો વધારો થશે.
- સ્વિમિંગ પૂલ્સ તમામ લોકો ખુલ્લા મૂકવામાં આવશે. હાલમાં સ્વિમિંગ પૂલ્સમાં ફક્ત સ્પોર્ટ્સપર્સન્સને જ મંજૂરી આપવામાં આવી છે.
- સામાજિક, ધાર્મિક અને શૈક્ષણિક વગેરેના મેળાવડામાં લોકોની સંખ્યાની મર્યાદામાં વધારો કરવામાં આવશે. હાલમાં બંધ હોલમાં બેઠક ક્ષમતાના 50 ટકા લોકોને જ મંજૂરી આપવામાં આવી છે.
- તમામ પ્રકારના એક્ઝિબિશન હોલને મંજૂરી આપવામાં આવશે.
- સિવિલ એવિયેશન મંત્રાલય પરિસ્થિતિનો તાગ મેળવશે અને બાદમાં ઈન્ટરનેશનલ એર ટ્રાવેલમાં વધુ છૂટછાટ આપવામાં આવશે.
- આરોગ્ય સેતુ મોબાઈલ એપનો ઉપયોગ આગળ પણ જારી રાખવામાં આવશે.