ભારતમાં એક દિવસમાં સૌથી વધુ કેસનો બુધવારે નવો રેકોર્ડ નોંધાયો છે. ભારતમાં કોરોનાના કુલ કેસનો આંકડો 9 લાખને પાર થઈ ગયો છે.
દેશમાં નવા નોંધાયેલા કેસનો આંકડો 32,000ને પર થઈને 32,498 થયો છે. આ સાથે કુલ કેસનો આંકડો 9,68,835 થઈ ગયો છે. આ સાથે એક દિવસમાં નોંધાયેલા મૃત્યુનો આંકડો પણ 615 થયો છે. ભારતમાં કોરોનાના કારણે થયેલા મોતનો આંકડો 24,860 પર પહોંચ્યો છે.
કુલ કેસમાંથી 6,11,973 દર્દીઓ સાજા થઈ ગયા છે. બીજી તરફ એક દિવસમાં નોંધાઈ રહેલા કેસ ચિંતાનો વિષય બની રહ્યા છે. જુલાઈ મહિનામાં 3,83,391 કેસ નોંધાય છે. આવું જ એક્ટિવ કેસમાં પણ જોવા મળ્યું. જોકે, 12,000નાં મોત જૂનમાં નોંધાયા છે, જ્યારે જુલાઈના પહેલા 15 દિવસમાં 7,468 લોકોના મોત નોંધાયા છે.
દેશમાં સાત રાજ્યોમાં બુધવારે સૌથી વધુ કેસ નોંધાયા છે. જેમાં કર્ણાટકમાં 3,176, આંધ્રપ્રદેશમાં 2,431, કેરળમાં 623, ગુજરાતમાં 925, ગોવામાં 198, પશ્ચિમ બંગાળમાં 1589 અને રાજસ્થાનમાં 866 કેસ નોંધાયા છે.
મહારાષ્ટ્ર, દિલ્હી, તામિલનાડુ અને ગુજરાત પછી પશ્ચિમ બંગાળ પાંચમું રાજ્ય બન્યું છે. જ્યાં વધુ 20 લોકોના કોરોના વાયરસના કારણે મોત નોંધાયા છે. કર્ણાટકા અને આંધ્રપ્રદેશમાં 87 અને 44 લોકોના કોરોના વાયરસના કારણે મોત થયા છે.
તામિલનાડુમાં વધુ 4,496 કેસ સાથે કોરોના વાયરસના કુલ કેસનો આંકડો 1,51,820 થયો છે, જ્યારે વધુ 68 લોકોના મોત થવાની સાથે રાજ્યમાં કુલ 2,167 કેસ થઈ ગયા છે.
મહારાષ્ટ્રમાં દેશમાં સૌથી ખરાબ સ્થિતિ છે. જ્યાં બુધવારે વધુ 233 મોત સાથે કુલ મૃત્યુઆંક 10,928 થયો છે. આ સાથે રાજ્યમાં વધુ 7,975 કેસ પાછલા 24 કલાકમાં નોંધાયા છે. પાછલા 15 દિવસમાં રાજ્યમાં 1,00,917 કોરોના કેસ નોંધાયા છે. મુંબઈમાં સ્થિતિ કાબૂમાં આવતી દેખાઈ રહી છે જોકે, અન્ય વિસ્તારોમાં સતત કેસ વધી રહ્યા છે.
અન્ય રાજ્યોની વાત કરીએ તો દિલ્હીમાં 41, ઉત્તરપ્રદેશમાં 29, ગુજરાતમાં 10, તેલંગાણામાં 11, પશ્ચિમ બંગાળમાં 20, બિહારમાં 14, જમ્મુ કાશ્મીરમાં 12 લોકોના મોત નોંધાયા છે.