દેશમાં કોરોનાથી 47,000+ મૃત્યુ, દુનિયામાં ભારત બ્રિટનને પાછળ છોડીને ચોથા નંબરે

નવી દિલ્હીઃ ભારતના કોરોના વાયરસના કેસનો કુલ આંકડો 24 લાખની નજીક પહોંચવા આવ્યો છે આ સાથે દુનિયામાં મૃત્યુઆંકની દૃષ્ટીએ ચોથા નંબરનો દેશ બન્યો છે. ભારતમાં અત્યાર સુધીમાં 47,000 કરતા વધારે લોકોના કોરોના વાયરસના કારણે મોત થઈ ગયા છે. કોરોના વાયરસના કારણે થનારા મૃત્યુની ટકાવારી 2 થઈ છે. આ સાથે ભારતે બ્રિટને CFR (Case fatality rate)માં પાછળ છોડી દીધું છે.

ભારતમાં બુધવારે વધુ 934 લોકોના મોત સાથે કુલ મૃત્યુઆંક 47,065 થઈ ગયો છે. આ સાથે ભારત બ્રિટનને પાછળ છોડીને મૃત્યુઆંકની દૃષ્ટીએ દુનિયાનો ચોથા નંબરનો દેશ બની ગયો છે. 13 દિવસ અગાઉ ભારતે ઈટલીને પાછળ છોડી દીધું હતું અને 5મા નંબરનો દેશ બની ગયો હતો. ભારતનો CFR 2 છે, જે બાકી દેશની સરખામણીમાં ઘણો જ ઓછો છે.

બુધવારે દેશના બીજા નંબરના સૌથી વધુ 64,610 કેસ નોંધાતા કુલ પોઝિટિવ કેસનો આંકડો 23,91,650 થયો છે. ભારતમાં સતત વધતા કેસનું કામ ટેસ્ટની સંખ્યામાં વધારો કરાયો હોવાનું પણ માનવામાં આવી રહ્યું છે. ભારતમાં ગુજરાત સહિત 5 રાજ્યોને ટેસ્ટ વધારવા માટે વડાપ્રધાન મોદીએ મુખ્યમંત્રીઓ સાથેની બેઠક દરમિયાન ટકોર કરી હતી.

દુનિયાની વાત કરીએ તો 20.44 મિલિયન કેસ થયો છે, જ્યારે 7,42,880 લોકોના મોત થઈ ગયા છે. ડિસેમ્બર 2019માં ચીનમાં વાયરસ દેખાયા બાદ અત્યાર સુધીમાં દુનિયાના 210 દેશો અને તેમની સરહદોમાં કોરોના વાયરસને એન્ટ્રી કરી લીધી છે. ભારતમાં કોરોના વાયરસને નવા સ્થળો પર ફેલાતો અટકાવવા માટે સતત પ્રયાસ કરી રહ્યા છે, આ સાથે નાગરિકોને પણ કોરોનાથી બચવા માટે જાગૃત કરવામાં આવી રહ્યા છે.