ચા પીવા હોસ્પિટલમાંથી બહાર નીકળી ગયા કોરોનાના દર્દી, લોકોમાં ફફડાટ

એવું કહેવાય છે કે ચા પીવી પણ એક પ્રકારનું વ્યસન છે. હોસ્પિટલમાં દાખલ કોરોના વાયરસના દર્દી ચા પીવા માટે કીટલી પર પહોંચી ગયા હોવાનો ચોંકાવનારો કિસ્સો સામે આવ્યો છે. આ ઘટના કર્ણાટકના બેંગલુરુની છે કે જ્યાં 73 વર્ષીય કોરોના વાયરસના દર્દી કીટલી પર ચા પીવા માટે હોસ્પિટલમાંથી બહાર નીકળી ગયા હતા અને ચાની દુકાન પર પહોંચી ગયા હતા.હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો73 વર્ષીય વૃદ્ધ વ્યક્તિનો કોરોના રિપોર્ટ પોઝિટિવ આવતા તેઓને હોસ્પિટલમાં દાખલ કરવા માટે લઈ જવામાં આવ્યા હતા. ત્યાં બેડ નહીં મળતા આ વૃદ્ધ દર્દીએ લગભગ 3 કલાક સુધી એમ્બુલન્સમાં રાહ જોઈ અને સવારે 5 વાગ્યે આ દર્દીએ હોસ્પિટલના સ્ટાફ પાસે ચા પીવાની વાત કરી.સવારે 7.30 વાગ્યા સુધી આ વૃદ્ધ વ્યક્તિએ ચાની રાહ જોઈ અને પછી જાતે જ તેઓ બેડમાંથી ઊભા થઈને નજીકની ચાની કીટલી પર પહોંચી ગયા. દર્દીની હાલત જોઈને ત્યાં કોઈએ પૂછ્યું તો આ દર્દીએ જવાબ આપતા કહ્યું કે હું કોરોનાનો દર્દી છું અને અહીં બહાર ચા પીવા માટે આવ્યો છું. આ દર્દીએ વધુમાં જણાવ્યું કે હોસ્પિટલમાં એક કપ ચા નથી મળી રહી. આ સાંભળતા જ ચાની કીટલી પર ઊભેલા અન્ય 7 લોકો ત્યાંથી જતા રહ્યા.ટી-સ્ટોલના માલિકે જણાવ્યું કે આ વૃદ્ધ વ્યક્તિએ જ્યારે અહીં આવીને કહ્યું કે તેઓ કોરોનાના દર્દી છે તો આ સાંભળીને જ કીટલી પર ચા પી રહેલા લોકો પૈસા આપ્યા વિના જતા રહ્યા. મારે તાત્કાલિક ચાની દુકાન બંધ કરવી પડી. મેં જ્યારે હોસ્પિટલમાં જઈને આ અંગે વાત કરી ત્યારે હોસ્પિટલનો સ્ટાફ આવીને આ વૃદ્ધ વ્યક્તિને વોર્ડમાં લઈ ગયો. આ વૃદ્ધ વ્યક્તિ પણ ગુસ્સામાં હતા, તેમણે જણાવ્યું કે એક હોસ્પિટલમાંથી બીજી હોસ્પિટલમાં શિફ્ટ થતા 8 કલાકનો સમય લાગ્યો. પણ, મને એક કપ ચા મળી નહી. હાલ તેમની હોસ્પિટલમાં સારવાર ચાલુ છે.