BJP અધ્યક્ષ જેપી નડ્ડાને થયો કોરોના, ટ્વિટ કરીને આપી જાણકારી

નવી દિલ્હીઃ ભાજપ અધ્યક્ષ જેપી નડ્ડાને કોરોના વાયરસનો ચેપ લાગ્યો છે. તેમણે રવિવારે ટ્વિટ કરીને પોતે કોરોના પોઝિટિવ આવ્યા હોવાની જાણકારી આપી હતી અને છેલ્લા થોડા દિવસોથી તેમના સંપર્કમાં આવેલા લોકોને પણ ટેસ્ટ કરાવવાની અપીલ કરી છે. નડ્ડાએ તે પણ કહ્યું હતું કે, તેમની તબીયત સારી છે અને હોમ આઈસોલેશન અંતર્ગત ગાઈડલાઈનનું પાનલ પણ કરી રહ્યા છે. અગાઉ પણ ભાજપના ઘણા નેતાઓ કોરોનાગ્રસ્ત થયા હતા.

ભાજપ અધ્યક્ષ તાજેતરમાં જ પશ્ચિમ બંગાળની મુલાકાતે ગયા હતા. તેમણે ત્યાં ચૂંટણી રેલીને સંબોધિત કરી હતી. આ દરમિયાન તેમના કાફલા પર હુમલો થવાની ઘટના બની હતી. જેના કારણે ઘણો મોટો વિવાદ પણ ઊભો થયો હતો. અગાઉ ભાજપના નેતા અને કેન્દ્રીય ગૃહમંત્રી અમિત શાહ, અર્જુન રામ મેઘવાલ અને કૈલાશ ચૌધરીને પણ કોરોના થયો હતો. જોકે, હાલમાં આ તમામ નેતાઓ કોરોના મુક્ત થઈ ગયા છે.
ભાજપના યુપીથી આવતા નેતા અને ભૂતપૂર્વ ક્રિકેટર ચેતન ચૌહાણ, રાજ્ય સરકારમાં મંત્રી રહેલા કમલ રાની વરૂણ અને રાજસ્થાનના ભાજપના ધારાસભ્ય કિરણ મહેશ્વરીને કોરોના થયો હતો અને કોરોનાના કારણે તેમનું નિધન થયું હતું. ફક્ત જ ભાજપ નહીં દેશના અન્ય પક્ષોના નેતાઓને પણ કોરોનાનો ચેપ લાગ્યો હતો.