પત્ની જાતીય સુખ આપતી ન હોવાની તપાસ પતિ કરાવી શકે: મુંબઇ હાઇકોર્ટ

એજન્સી મુંબઇ

મુંબઇ હાઇકોર્ટે પતિ દ્વારા છૂટાછેડા માગવાના એક મામલામાં પત્નીની મેડિકલ તપાસ કરવાના ફેમિલી કોર્ટના આદેશને માન્ય રાખ્યો છે. પતિનો દાવો છે કે તેની પત્નીએ ક્યારેય તેની સાથે સેક્સ ન કરીને લગ્ન સંબંધોને માન્યતા આપી જ નથી.

પતિએ આ આધારે પાંચ વર્ષ અગાઉ કોર્ટમાં અરજી કરી હતી. કેસની સુનાવણી કરતાં ફેમિલી કોર્ટે મહિલાની મેડિકલ તપાસ કરવાનો આદેશ આપ્યો હતો. શું મહિલા ‘સેક્સ માણી શકે’ તેવી સ્થિતિમાં નથી તેવી તપાસ કરવાની પણ તેની સૂચના હતી. મહિલાએ આ ચુકાદાને હાઇકોર્ટમાં પડકાર્યો હતો. પરંતુ તેની અરજી નકારી દેવાઇ હતી. આ દંપતિના લગ્ન ૨૦૧૦માં થયા હતાં. એ વખતે મહિલાની વય ૩૩ વર્ષ હતી તો પતિની વય ૩૮ વર્ષની હતી. બન્નેના આ બીજાં લગ્ન હતાં. પતિનો દાવો છે કે તેની પત્નીએ ક્યારેય તેની સાથે સેક્સ કર્યું જ ન હતું. તેણે આ આધારે જ પાંચ વર્ષ પહેલાં છૂટાછેડાની અરજી કરી હતી. પતિનો આરોપ હતો કે તેની પત્ની સેક્સ જ કરી શકતી નથી.

પતિની અરજીને માન્ય રાખીને ફેમિલી કોર્ટે મેડિકલ બોર્ડને નિર્દેશ આપ્યો હતો કે તે મહિલાની મેડિકલ તપાસ કરીને જાણ કરે કે મહિલામાં શું સમસ્યા છે? આ તપાસ ઓગસ્ટમાં થવાની હતી. પરંતુ મહિલાએ તેની સામે હાઇકોર્ટમાં અરજી કરી હતી. કોર્ટે એમ કહીને મહિલાની અરજી નકારી હતી કે લગ્નનો અંત લાવવા માટે મેડિકલ તપાસ જરૂરી છે. અદાલતે એવું પણ કહ્યું કે મહિલાએ ફેમિલી કોર્ટ સમક્ષ સ્વીકાર્યું હતું કે તે તપાસ માટે તૈયાર છે.