ભારતમાં પાછલા 4 મહિનાના સૌથી ઓછા કોરોનાના કેસ નોંધાયા, જુન પછીના સૌથી ઓછા મૃત્યુઆંક

નવી દિલ્હીઃ ભારતમાં નવેમ્બર મહિના દરમિયાન કોરોના વાયરસના નવા 12.8 લાખ કેસ નોંધાયા છે, જે પાછલા 4 મહિનામાં નોંધાયેલા સૌથી ઓછા કેસ છે, જ્યારે મૃત્યુઆંક જુલાઈમાં એટલે પાંચ મહિના પહેલા નોંધાયા હતા તેના કરતા ઓછા છે. સરકાર પાસેથી મળેલા આંકડા મુજબ નવેમ્બરમાં કોરોનાના કારણે 15,494 લોકોએ જીવ ગુમાવ્યો છે, જ્યારે ઓક્ટોબરમાં 23,472 કેસ નોંધાયા હતા. આ પહેલા જુન મહિનામાં 11,988 દર્દીઓએ કોરોનાના કારણે જીવ ગુમાવ્યો હતો.

પાછલા મહિનાની સરખામણીમાં નવેમ્બરમાં કોરોનાના કેસમાં 32% ટકાનો ઘટાડો નોંધાયો છે, જ્યારે ઓક્ટોબરમાં 18.8 લાખ જેટલા કોરોનાના નવા કેસ નોંધાયા હતા. દેશમાં સતત બીજા મહિને કોરોના વાયરસના કેસમાં ઘટાડો નોંધાયો છે, સપ્ટેમ્બરમાં 26.2 લાખ કોરોનાના નવા કેસ નોંધાયા હતા.

સપ્ટેમ્બર પછી કોરોનાના કારણે થતા મૃત્યુઆંકમાં પણ ઘટાડો નોંધાયો છે, સરકારી આંકડા પ્રમાણે ત્યારે 33,255 લોકોએ કોરોનાના કારણે જીવ ગુમાવ્યો હતો.

અઠવાડિયા દરમિયાન મહારાષ્ટ્રમાં કોરોનાના નવા કેસમાં ઉછાળો નોંધાયો છે. પાછલા અઠવાડિયા (22-29 નવેમ્બર)માં મહારાષ્ટ્રમાં 39,851 નવા કેસ નોંધાયા છે, જે પાછલા અઠવાડિયા કરતા 7,000 વધુ છે. 6 અઠવાડિયા પછી ફરી એકવાર અહીં અઠવાડિયે નોંધાતા કેસમાં ઉછાળો આવ્યો છે.

આ પછી દિલ્હી બીજા નંબર છે, જ્યાં 36,785 કેસ નોંધાયા છે, અહીં પાછલા અઠવાડિયે 44,458 કેસ નોંધાયા હતા. અઠવાડિયા દરમિયાન રાજધાનીમાં 6,885 કેસનોં ઘટાડો નોંધાયો છે. પાછલા અઠવાડિયા સાથે સરખામણી કરીએ તો કેસમાં ઘણો ઘટાડો નોંધાયો છે.

મહારાષ્ટ્ર સિવાય રાજસ્થાન (+3,331), મધ્યપ્રદેશ (+2,584), પંજાબ (+2,504), ગુજરાત (+1,764) અને હિમાચલ પ્રદેશ (+1,062) પણ દેશમાં કોરોના હોટસ્પોટ તરીકે સામે આવ્યા છે. જોકે, આમાંથી ઘણાં રાજ્યમાં અઠવાડિયાની શરુઆત કરતા અંત તરફ આવતા કેસમાં ઘટાડો પણ નોંધાયો છે.

દિલ્હી પછી આંધ્રપ્રદેશમાં પણ કોરોના વાયરસના અઠવાડિયા દરમિયાન નોંધાતા કેસમાં ઘટાડો નોંધાયો છે, અહીં પાછલા અઠવાડિયા કરતા 2,732 કેસ ઘટ્યા છે. આ સિવાય હરિયાણા (-2,204), કેરળ (-1,605), તામિલનાડુ (-1,294) અને ઓડિશા (-956)માં કેસમાં ઘટાડો નોંધાયો છે.

સોમવારે ભારતમાં 31,249 નવા કેસ નોંધાયા છે, જ્યારે દેશમાં 486 લોકોએ જીવ ગુમાવ્યો છે. પાછલા અઠવાડિયા કરતા અહીં કેસમાં ઘટાડો નોંધાયો છે. વિકએન્ડ દરમિયાન ટેસ્ટમાં સ્ટાફની અછત અને ટેસ્ટની સંખ્યામાં ઘટાડાની પણ અસર હોઈ શકે છે. પાછલા અઠવાડિયાઓ દરમિયાન પણ સોમવારે કેસ ઘટતા રહ્યા છે. જોકે, રવિવારે નોંધાયેલા 445 મૃત્યુ કરતા આંકડો ઊંચો આવ્યો છે.