જોડિયા દીકરીઓ જન્મી તો સાસરિયાઓ પિયરથી રથ પર બેસાડીને ઘરે લાવ્યા

એમપીના ધાર જિલ્લામાં સ્થિત એક પરિવારમાં પુત્રવધૂએ પિયરમાં ઘરે જોડિયા પુત્રીઓને જન્મ આપ્યો છે. પુત્રવધૂ 11 સપ્ટેમ્બર 2021ના રોજ માતા બની હતી. જોડિયા દીકરીઓના જન્મથી ઘરમાં ખુશીની લહેર છવાઈ ગઈ હતી. સાસરિયાંઓએ ઘરમાં દીકરીઓના આગમનની ભવ્ય તૈયારીઓ કરી હતી કારણ કે, કંઈક અલગ જ કરવાનો પ્લાન હોવાથી જોડિયા પુત્રીઓ સાથે પુત્રવધૂને સાસરિયાઓ દ્વારા રથમાંથી લાવવામાં આવી છે. આ દરમિયાન આખા શહેરના લોકો જોતા જ રહી ગયા. વહુ અને જોડિયા દીકરીઓના સ્વાગતની સુંદર તસવીરો સામે આવી છે.
ગણેશ ચતુર્થીના દિવસે જોડિયા દીકરીઓનો જન્મ
ધાર જિલ્લાના કુક્ષી તહસીલના કોંડા ગામમાં ભાયલ પરિવારની પુત્રવધૂએ ગણેશ ચતુર્થીના દિવસે પિયરમાં જોડિયા દીકરીઓને જન્મ આપ્યો હતો. દીકરીઓને જન્મ આપ્યા બાદ પુત્રવધૂ સાસરે આવી ન હતી. જો કે, બાદમાં પુત્રવધૂને સાસરે લાવવાની તૈયારીઓ શરૂ થઈ. જન્મના ચાર મહિના બાદ દાદાના ઘરે દીકરીઓનો પ્રવેશ થયો છે.
બે કિલોમીટર સુધી સરઘસ કાઢવામાં આવ્યું
ઘરે આવતા જોડિયા પૌત્રીઓના સ્વાગત માટે દાદાએ ભવ્ય તૈયારીઓ કરી હતી. દીકરીઓને પિયરથી લઈને આવેલી પુત્રવધૂ પહેલા જેકલ માતાના મંદિરે પહોંચી હતી. અહીં સાસરિયાઓ સ્વાગત માટે તૈયાર હતા. અહીં સસરા અને પતિની સાથે પરિવારના અન્ય સભ્યો પણ હાજર હતા. જેકલ માતાના મંદિરથી ઘરનું અંતર બે કિલોમીટર છે. જ્યાંથી પરિવારના સભ્યો નાચતા-ગાતા પુત્રવધૂને ઘરે લઈ ગયા હતા.
પુત્રવધૂ રથ પર સવાર થઈને ઘરે પહોંચી
જોડિયા દીકરીઓના જન્મથી સાસરિયાઓ ખૂબ જ ખુશ છે. તેઓ તેમની પુત્રવધૂને મંદિરમાંથી રથ પર બેસીને ઘરે લઈ આવ્યા છે. પુત્રવધૂ, જોડિયા પુત્રીઓ અને પરિવારની અન્ય મહિલાઓ પણ રથ પર બેઠી હતી. આ દરમિયાન પરિવારના અન્ય સભ્યો રથની સાથે નાચતા-ગાતા હતા. આ દરમિયાન લોકો ડીજેના તાલે અને ઢોલના તાલે નાચી રહ્યા છે, તેમજ ઉપરથી ફૂલોનો વરસાદ પણ કરવામાં આવ્યો હતો.
બળદગાડા પર લઈ ગયા હતા જાન
દાદા જગદીશ ભાયલ અને પુત્રીઓના પિતા મયુર ભાયલની ખુશી જોવા જેવી હતી. જગદીશ ભાયલ એક ખેડૂત છે, જ્યારે પિતા મયુર ભયલ કપડાની દુકાન ચલાવે છે. જગદીશ ભાયલે ગયા વર્ષે તેમના પુત્ર મયુરની જાનમાં આવો જ તરીકો અપનાવ્યો હતો. તેઓએ બળદગાડા પર જાન લઈને આખા રસ્તે ડીજે પર નાચતા પુત્રવધૂને ઘરે લઈ આવ્યા અને હવે રથ પર પૌત્રીઓને ઘરે લઈને આવ્યા છે.
શહેરના લોકો જોતા જ રહી ગયાદીકરીઓના જન્મ પર પરિવારમાં આટલી ખુશી જોઈને બધા આશ્ચર્યચકિત થઈ ગયા. જ્યારે સરઘસ શહેરના માર્ગો પર ફાઢવામાં આવ્યું ત્યારે લોકો ઘરની છત પર ઉભા રહીને નિહાળી રહ્યા હતા. લોકો હવે ભાયલ પરિવારના વખાણ કરી રહ્યા છે. દીકરીઓનું નામ રિદ્ધિ અને સિદ્ધિ રાખવામાં આવ્યું છે.