વોટ્સએપ પર મિત્ર સાથે વાત કરતી હતી બહેન, નારાજ ભાઈએ ગોળી મારી દીધી

નવી દિલ્હી: ઉત્તર-પૂર્વ દિલ્હીના વેલકમ વિસ્તારમાં 17 વર્ષના એક છોકરાએ નાની બહેનને ગોળી મારી દીધી હોવાની ઘટના પ્રકાશમાં આવી છે. ભાઈ બહેનના તેના મિત્ર સાથે વાતચીત અને વોટ્સએપ પર ચેટ કરવાથી નારાજ હતો. મીડિયા રિપોર્ટ મુજબ આ ઘટના ગુરુવારની છે. ઇજાગ્રસ્ત 16 વર્ષની બાળકીને ખાનગી હોસ્પિટલમાં દાખલ કરવામાં આવી છે. મળતી માહિતી પ્રમાણે તેને પેટમાં એક ગોળી છે અને તે જોખમથી બહાર હોવાનું મનાય છે. પોલીસે આરોપી ભાઈને પકડ્યો છે અને તેની પૂછપરછ કરવામાં આવી રહી છે. વેલકમ પોલીસ સ્ટેશનમાં હત્યાના પ્રયાસનો કેસ પણ નોંધવામાં આવ્યો છે.

પહેલા ટોકી, ના માની તો ગોળી મારી દીધી
પીડિતા તેના માતાપિતા અને ભાઈ સાથે રહેતી હતી. તે શાળાએ જતી નહોતી. પોલીસના જણાવ્યા મુજબ ભાઈએ તેને ઘણી વખત ફોન પર કોઈ છોકરા સાથે વાત કરતા જોઈ હતી. વોટ્સએપ પર ચેટિંગને લઈને પણ ભાઈએ તેને ટોકી હતી. પોલીસના જણાવ્યા અનુસાર વારંવાર ના પાડી હોવા છતાં બહેન માની નહોતી. ગુરુવારે ભાઈએ તેની બહેનને ફરીથી છોકરા સાથે વાત કરતાં પકડી હતી, જ્યારે બંને વચ્ચે ઝઘડો થયો ત્યારે છોકરાએ અંદરથી પિસ્તોલ કાઢી હતી અને બહેનના પેટમાં ગોળી મારી હતી. માતા-પિતાએ ઇજાગ્રસ્ત છોકરીને તાત્કાલિક હોસ્પિટલમાં લઈ ગયા હતા, જ્યાંથી પોલીસને સમગ્ર ઘટના અંગે જાણ કરવામાં આવી હતી.

મીડિયા રિપોર્ટ મુજબ ડીસીપી (નોર્થ-ઇસ્ટ) વેદપ્રકાશ સૂર્યાએ જણાવ્યું હતું કે, છોકરો ઓપન સ્કૂલમાં અભ્યાસ કરે છે અને સલૂનમાં નોકરી કરે છે. આ બનાવમાં કથિત રૂપથી ઘટનામા વપરાયેલી એક પિસ્તોલ પણ તેની પાસેથી મળી આવી છે. સૂર્યાના જણાવ્યા અનુસાર, છોકરાએ જણાવ્યું હતું કે, તેને ત્રણ ચાર મહિના પહેલા મૃત્યુ પામેલા મિત્ર પાસેથી આ હથિયાર મળ્યું હતું. પોલીસ આ દાવાની પણ ચકાસણી કરી રહી છે.