જેલમાં બિંદાસ મસાજ કરાવતા જોવા મળ્યા દિલ્હીના મંત્રી સત્યેન્દ્ર જૈન, જુઓ વાયરલ થયેલા વિડીયો

દિલ્હીની આપ સરકારના મંત્રી સત્યેન્દ્ર જૈનના કેટલાક ચોકાવનારા વિડીયો સામે આવ્યા બાદ ભારે વિવાદ સર્જાયો છે. આ વિડીયો જેલના CCTVના ફુટેજ છે, જેમાં પથારી પર સત્યેન્દ્ર જૈન મસાજ કરાવતા જોવા મળી રહ્યા છે. વિડીયો સામે આવ્યા બાદ ભાજપે દિલ્હીની આપ સરકાર પર નિશાન સાધ્યું છે.


ભાજપના પ્રવક્તા શહજાદ પૂનાવાલાએ કેજરીવાલ અને પક્ષની ટીકા કરી છે અને આરોપ પણ લગાવ્યો છે. તેમણે આ વિડીયો શેર કરતા જણાવ્યું કે આપ સરકારે જેલના નિયમોનું ઉલ્લંઘન કર્યું છે અને સજાને બદલે સત્યેન્દ્ર જૈનને VVIP ટ્રીટમેન્ટ મળી રહી છે. ભાજપ પ્રવક્તાએ વિડીયો શેર કરતાં કહ્યું કે સત્યેન્દ્ર જૈન સજાને બદલે જેલમાં સંપૂર્ણ VVIP મજા લઈ રહ્યા છે. તિહાર જેલમાં મસાજની મજા લઈ રહ્યા છે. 5 મહિનાથી જેમને જામીન નથી મળ્યા તેમના માથાની મસાજ. આમ સરકારે જેલના નિયમોનું ઉલ્લંઘન કર્યું છે.

આમ આદમી પાર્ટીએ શું કહ્યું
બીજીબાજુ તિહાર વિડીયો અંગે મનીષ સિસોદિયાએ કહ્યું છે કે કરોડરજ્જાના હાંડકામાં જે ઈજા પહોંચી હતી તેને લીધે, ડોક્ટરોએ સત્યેન્દ્ર જૈનને ફિજીયોથેરાપીની સલાહ આપી હતી. ભાજપ તેમની બીમારીની પણ મજાક બનાવી રહ્યો છે.

ભાજપ આ બધુ એટલા માટે કરી રહી છે કારણ કે તે ગુજરાત વિધાનસભા તથા દિલ્હી MCD ચૂંટણીમાં હારવા જઈ રહી છે. કોર્ટે પણ EDને આ વિડીયો લીક નહીં કરવા આદેશ કર્યો હતો. પણ કોર્ટના આદેશનું ઉલ્લંઘન કરવામાં આવ્યું છે.આ વિડીયો 13 સપ્ટેમ્બર 2022ના રોજનો છે. આ વિડીયો 6 મિનિટનો છે અને તિહાડ જેલના સેલ-4 બ્લોક Aના CCTV ફૂટેજ છે.

આ વિડીયોમાં શું જોવા મળે છે
આ વિડીયોમાં સ્પષ્ટપણે જોઈ શકાય છે કે એક વિક્તિ સત્યેન્દ્ર જૈનના પગ પર મસાજ કરી રહ્યો ચે. અત્રે ઉલ્લેખનીય છે કે EDએ કેટલાક દિવસ પહેલા આરોપ લગાવ્યો હતો કે તિહાડ જેલમાં સત્યેન્દ્ર જૈનને VIP ટ્રીટમેન્ટ મળી રહી છે. ત્યારબાદ દિલ્હીના LGના આદેશ પર એક તપાસ સમિતિની રચના કરવામાં આવી છે. ત્યારબાદ 7 નવેમ્બરના રોજ સુપરિન્ટેન્ડેન્ટ અજીત સહિત 58 લોકોને ટ્રાન્સફર કરવામાં આવ્યા હતા.
EDએ તેના સોગંદનામામાં જૈનને મસાજ સુવિધા આપવામાં આવતી હોવાની વાત કહી હતી. EDએ આરોપ લગાવ્યો હતો કે જૈનને હેડ મસાજ, ફુટ મસાજ તથા બેક મસાજ મળે છે.

જૈને ફુટેજ પર પ્રતિબંધની માગ કરી હતી
EDએ તિહારમાં સત્યેન્દ્ર જૈનને મસાજ આપવાને લગતા ફુટેજ મેળવ્યા હતા,આ વિડીયો હવે વાયરલ થઈ રહ્યા છે, જોકે તેમણે કોર્ટ સમક્ષ માગ કરી હતી કે આ ફુટેજ લીક કરવામાં ન આવે.