ઉદ્ધવ ઠાકરે પર વરસ્યા ફડણવીસ, કહ્યું 'દાઉદનું ઘર છોડી દીધું અને કંગનાનું તોડી પાડ્યું'

મુંબઈઃ મહારાષ્ટ્રમાં સત્તાધારી પક્ષ શિવસેના અને એક્ટ્રેસ કંગના રનૌત વચ્ચે ચાલી રહેલા ઘમાસાણે હવે રાજકીય રંગ પકડ્યો છે. રાજ્યના પૂર્વ મુખ્યમંત્રી દેવેન્દ્ર ફડણવીસે કંગના રનૌતની ઓફિસમાં તોડફોડને લઈને ઉદ્ધવ ઠાકરે સરકાર પર નિશાન તાક્યું છે. ફડણવીસે કહ્યું કે, દાઉદ ઈબ્રાહિમનું ઘર તો તોડી શકાતું નથી, જ્યારે કંગનાનું ઘર તોડવામાં આવી રહ્યું છે.

ફડણવીસે ઉદ્ધવ સરકાર અને શિવસેના પર નિશાન સાધતા કહ્યું કે, 'આ સમગ્ર મામલાને શિવસેનાએ આગળ વધાર્યો છે, ભાજપે નહીં. મહારાષ્ટ્ર સરકાર કંગના સાથે લડી રહી છે. કંગના કરતાં કોરોના સામે લડત તો વધારે સારું રહેત. દાઉદ ઈબ્રાહિમનું ઘર તો તોડવા નથી જતાં. કંગના રનૌતની ઓફિસ તોડી પાડવામાં આવી'.

આ વિવાદની વચ્ચે કેન્દ્રીય મંત્રી રામદાસ અઠાવલેએ મહારાષ્ટ્રના રાજ્યપાલ ભગત સિંહ કોશ્યારી સાથે મુલાકાત કરી હતી. અઠાવલેએ કંગના રનૌતની ઓફિસ પર BMC દ્વારા કરવામાં આવેલી કાર્યવાહીને ખોટી ગણાવતાં રાજ્યપાલ પાસેથી વળતરની માગ કરી હતી. આ પહેલા ગુરુવારે રિપબ્લિકન પાર્ટી ઓફ ઈન્ડિયાના ચીફ રામદાસ અઠાવલેએ કંગના સાથે તેના ઘરે 1 કલાક સુધી મીટિંગ કરી હતી. તેમણે કંગનાને સુરક્ષાનું વચન આપ્યું હતું અને કહ્યું હતું કે, તે રાજનીતિમાં આવવા ઈચ્છે છે તો ભાજપ અને RPI તેનું સ્વાગત કરશે.



કંગનાએ આ મામલે કોંગ્રેસ અધ્યક્ષ સોનિયા ગાંધીના મૌન પર પણ સવાલ ઉઠાવ્યા છે. કંગનાએ ટ્વીટ કરતાં કહ્યું હતું કે, એક મહિલા હોવાના નાતે શું તેમને તકલીફ નથી થતી કે કંગનાની સાથે મહારાષ્ટ્ર સરકાર આવું વર્તન કરી રહી છે? કંગનાએ સવાલ કર્યો, શું તમે તમારી પાર્ટીને નથી કહી શકતા કે તેઓ બંધારણના સિદ્ધાંતોનું પાલન કરે જે આપણને ડોક્ટર આંબેડકરે આપ્યા છે.

કંગના રનૌત અને શિવસેના વચ્ચેના વિવાદમાં હવે NCPના અધ્યક્ષ જયંત પાટીલ પણ કૂદી પડ્યા છે. તેમણે કહ્યું કે, કંગના પબ્લિસિટી સ્ટંટ માટે આ બધું કરી રહી છે. તેમણે કહ્યું કે, કંગનાએ મહારાષ્ટ્ર અને મુંબઈ માટે અપશબ્દોનો ઉપયોગ કરીને મુંબઈનું અપમાન કર્યું છે. NCPના અધ્યક્ષે તેમ પણ કહ્યું કે, સુરક્ષિત શહેરની સરખામણી પાકિસ્તાન સાથે કરવી નિંદનીય છે.