અંડરવર્લ્ડ ડૉન રવિ પૂજારી આફ્રિકન દેશ સેનેગલમાંથી ઝડપાયો

અમદાવાદ: 75થી પણ વધુ ગુજરાતી વેપારીઓ, રાજકારણીઓ તેમજ પ્રોફેશનલ્સને ધમકી આપી ખંડણી માગનારા ડૉન રવિ પૂજારીની આફ્રિકન દેશ સેનેગલમાંથી ધરપકડ કરાઈ છે. ગુજરાત એટીએસ અને બેંગલોર પોલીસના સંયુક્ત ઓપરેશનમાં રવિ પૂજારીને ઝડપી લેવાયો હતો.રવિ પૂજારીની 22 જાન્યુઆરીએ જ ધરપકડ કરી લેવાઈ છે, અને ત્યાંની એમ્બસીએ ભારતીય એમ્બસીને આ અંગે 26 જાન્યુઆરીએ માહિતી આપી હતી. પૂજારીને પૂછપરછ માટે ભારત પણ લવાઈ શકે છે.સૂત્રોના જણાવ્યા અનુસાર, પૂજારી સેનેગલમાં મહારાજા નામનું રેસ્ટોરાં ચલાવતો હતો, અને તેની સાથે મુંબઈ તેમજ ભારતના અન્ય શહેરોમાં ખંડણી માગવા ફોન પણ કરતો હતો. તાજેતરમાં જ મુંબઈ પોલીસે આકાશ શેટ્ટી અને વિલિયમ રોડ્રિગ્સ નામના બે આરોપીઓની ધરપકડ કરી હતી.. જેમાં વિલિયમે પૂજારીનું લોકેશન આપ્યું હોવાનુંક હેવાઈ રહ્યું છે.રવિ પૂજારી અગાઉ છોટા રાજન ગેંગ સાથે જોડાયેલો હતો. સપ્ટેમ્બર 2000માં બેંગકોકમાં છોટા રાજન પર અટેક થતાં તેની ગેંગમાં ભાગલા પડ્યા હતા, અને પૂજારીએ તે વખતે પોતાની અલગ ગેંગ બનાવી લીધી હતી. તેણે બિલ્ડરો, પત્રકારો, બોલિવુડ હસ્તીઓને પણ ધમકાવ્યા હતા. ડિરેક્ટર મહેશ ભટ્ટની તેણે બે વાર હત્યા કરવાની પણ કોશીશ કરી હતી.