ટ્રકની ફ્યુઅલ ટેન્કમાં સંતાડીને લઈ ભારતમાં લાવી રહ્યા હતા 35 કરોડનું સોનું

નવી દિલ્હીઃ ડિરેક્ટોરેટ ઓફ રેવન્યુ ઇન્ટેલિજન્સ (ડીઆરઆઈ) એ સોનાનો મોટો જથ્થો પકડ્યો છે અને 5 લોકોની ધરપકડ કરી છે. જપ્ત કરેલા સોનાનું વજન 66.4 કિલો છે અને તેની કિંમત 35 કરોડ રૂપિયા છે. આ સોનું ભારત-મ્યાનમાર બોર્ડરથી ભારતમાં દાણચોરી કરવામાં આવતું હતું અને તેને ટ્રકની ફ્યુઅલ ટેન્કમાં છુપાવી પંજાબ લઈ જવામાં આવતું હતું.

સરકારી સૂત્રોએ જણાવ્યું હતું કે ડીઆરઆઈને બાતમી મળી હતી કે વિદેશથી લાવવામાં આવેલું સોનું બે ટ્રકમાં ભરીને લઈ જવામાં આવે છે. આ સોનાની ભારત-મ્યાનમાર બોર્ડરથી દાણચોરી કરવામાં આવી હતી. આ ટ્રક ડીઆરઆઈ ઓફિસમાં લાવવામાં આવી હતી. ટ્રકોની નજીકથી તપાસ કરતાં 166 ગ્રામની 400 લગડીઓ મળી આવી હતી તેનું કુલ વજન 66.4 કિલો છે અને કિંમત 35 કરોડ છે. સોનાને ટ્રકની ફયુઅલ ટેન્કમાં છુપાવવામાં આવ્યું હતું. આ કેસમાં 5 લોકોની ધરપકડ કરવામાં આવી છે અને તેમની પૂછપરછ કરવામાં આવી રહી છે.

બાંગ્લાદેશ અને મ્યાનમારની ખુલ્લી સીમા દેશમાં ગેરકાયદેસર સોનાની આયાત માટેનો મુખ્ય માર્ગ બની ગઈ છે. દેશભરના વિમાની મથકો અને બંદરો પર દેખરેખ વધવાના કારણે બાંગ્લાદેશ અને મ્યાનમાર રસ્તે ગેરકાયદેસર સોનાના પ્રમાણમાં વધારો થયો છે. સોના પર 3% જીએસટી સાથે કરનો દર 15.5% છે. દાણચોરી કરેલું સોનું કાયદેસર આયાત કરતા નજીવી છૂટ પર વેચાય છે. વેપાર સંગઠનોના અંદાજ મુજબ, વાર્ષિક 100-120 ટન સોનાની દાણચોરી કરવામાં આવે છે.